АҞӘА, жәабран 6 – Sputnik, Амра Амҷԥҳа. Ахьтәы медалқәа ҩба, аразны медалқәа ҩба, аџьаз иалху медалк Аԥсныҟа иааргеит 2001 шықәса рзы ииз арԥарцәеи аҭыԥҳацәеи рыбжьара зых иақәиҭу ақәԥаразы Жәларбжьаратәи атурнир Аԥснытәи алахәылацәа. Абри атәы Sputnik акорреспондент илзеиҭеиҳәеит СССР аспорт азҟаза, азыҟаҵаҩ Игор Бераиа.
Жәашықәса зхыҵуа, Игор Бераиеи Мираб Ҳашбеи рааӡамҭаҩцәа Едуард Урчукови Богдан Кәыҵниеи актәии аҩбатәии аҭыԥқәа ааныркылеит.
"Едуард Урчуков ф-еисарак мҩаԥигеит, Богдан Кәыҵниагьы убас. Рҩыџьагьы аԥыжәара ргеит", — иҳәеит Игор Бераиа.
76 кьыла зкапануа аспортсменцәа рыбжьара актәи аҭыԥ ааникылеит Даниил Џьопуа, 58 кьыла зкапануаз рыгәҭа аҩбатәи аҭыԥ ааникылеит — Даниил Харчлаа, 63 кьыла зкапануаз рыгәҭа аҩбатәи аҭыԥ ианашьахеит Анри Кәыҵниа. Разыҟаҵаҩ — Размик Алабиан.
Атурнир иалахәын 13-ҩык аспортсменцәа. Зынӡа атурнир иалахәын 200-ҩык аспортсменцәа: Израиль, Латвиа, Литва, Естониа, Белоруссиа, Финлиандиа, Германиа, Урыстәыла рҟынтәи.
"Атурнир алахәхаразы аԥара еизызгаз зегьы ҭабуп ҳәа раҳҳәоит. Изылшоз зегьы иаҳзеизыргон. Атурниргьы алахәылацәагьы акыр иӷәӷәан. Аԥсны абираҟ ҳаҵагыланы ҳақәгылан. Ҳаспортсменцәагьы ибзианы рхы аадырԥшит. Асеиԥш иҟоу атурнирқәа аԥышәа бзиа рырҭоит", — иҳәеит Бераиа.
2001 шықәса рзы ииз арԥарцәеи аҭыԥҳацәеи рыбжьара зых иақәиҭу ақәԥаразы Жәларбжьаратәи атурнир мҩаԥысит Калининградтәи аобласт, ақалақь Гусев аҟны, жәабран 3-4 рзы.
