АҞӘА, жәабран 28 – Sputnik. Жәларбжьаратәи аҳәса рымшныҳәа, хәажәкыра 8 рзы имҩаԥысраны иҟоу Арт-маркете 2018 аҿы раԥхьаӡа акәны иаартхоит апресс-центр, ауснагӡатә ахаҭа акәзар онлаин-рбара ҟалоит аинтернет аҿы ҳәа радио Sputnik Аԥсны иазеиҭалҳәеит арт-маркет аидеиа автор, аиҿкааҩ Ксениа Ирисова-Багаԥшь.
"Сара Аԥсны ажурналистцәа зегьы ҭабуп ҳәа расҳәоит аханатәгьы сидеиа адгылара ахьарҭоз азы, апроект бзиа иахьырбаз азы. Уи аҭакс ҳаргьы сынтәа раԥхьаӡа акәны арт-маркет аҿы апресс-центр ааҳартуеит", — ҳәа азгәалҭеит арт-маркет аидеиа автор, аиҿкааҩ Ксениа Ирисова-Багаԥшь.
Хыԥхьаӡарала ифбатәиу арт-маркет мҩаԥысраны иҟоуп Жәларбжьаратәи аҳәса рымшныҳәазы, хәажәкыра 8 рзы. Арт-маркет иалахәхар рылшоит изҭахны иҟоу зегьы.
"Қәрала аум, нхарҭаҭыԥла аума иарбанызаалак ԥкырак ыҟам. Арт-маркет жәларбжьаратә проектуп ҳәа азуҳәо иҟалахьеит. Арахь иаҳзаауеит аҽалархәразы Урыстәыла ақалақьқәа рҟынтәи, рхы аладырхәуеит Ҭырқәтәылатәи арепатриантцәа", — лҳәеит лара.
Арт-маркет аиҿкааҩ илҳәоит афестиваль аҳәаақәа ирҭагӡаны есышықәса ишымҩаԥырго агәыҳалалратә лотареиа. Уи иаҭныҵуа аԥарақәа рыздырхоит Тҟәарчал инхо зылшара ԥкуи ахәыҷырацәа змоуи аҭаацәарақәа.
Раԥхьаӡа акәны арт-маркет мҩаԥысит Аҟәа, 2013 шықәса рзы.
