АҞӘА, хәажәкыра 15 — Sputnik. Украина аҿари аспорти рзы аминистр Игорь Жданов Урыстәыла иахьаҵанакуа имҩаԥысуа иарбанызаалак аицлабрақәа "украинатәи аспортсменцәа рзы ишәарҭоуп" ҳәа ахиҳәааит. Убри инамаданы Украинатәи аспортсменцәа Урыстәыла имҩаԥысуа аицлабрақәа ирылахәхом. Абри азы аусԥҟа анапы аҵаҩуп ҳәа аанацҳауеит РИА Новости.
"Сара аусԥҟа снапы аҵазҩит Украинатәи аспортсменцәа Урыстәыла имҩаԥысуа иарбанызаалак аицлабрақәа ишрылахәымхо азы", — ҳәа иҩуеит Жданов Facebook аҿы идаҟьаҟны.
Жданов жәларбжьаратәи аиҿкаарақәа рахь ааԥхьара ҟаиҵеит Урыстәылатәи Афедерациа иахьаҵанакуа аицлабрақәа мҩаԥырымгаларц.
Уаанӡа Украина апрезидент инапы аҵеиҩхьан Донбасс аиҭархынҳәразы азакәан.
Украин апрезидент Петр Порошенко азакәан аҟны Киев анапаҵаҟа иҟам аҵакырадгьылқәа "аоккупациа" зызуу ҳәа ишьоит, Урыстәыла акәзар "атәыла-агрессор" ҳәа ишьоит.
