АҞӘА, мшаԥы 5 – Sputnik. Аԥсны Ахада Рауль Ҳаџьымба Максим Горьки иԥа имоҭа Екатерина Пешкова дидикылеит. Максим Горьки иԥа имоҭа Екатерина Пешкова Аԥсныҟа дааит Максим Горьки диижьҭеи 150-шықәса аҵра иазку аиубилеитә уснагӡатәқәа дрылахәхарц азы. Абри атәы аанацҳаит атәыла Ахада иофициалтә саит.
Рауль Ҳаџьымба иазгәеиҭеит Аԥсны ибзианы ишырдыруа, бзиагьы ишырбо Максим Горьки ирҿиамҭақәа.
"Агәахәара ду снаҭоит Аԥсны шәахьызбо. Агәахәара снаҭоит шәыҿцәажәара. Усҟантәи аамҭақәа рзы инхоз, аҭоурых зырҿиоз ԥсра рықәӡам", — иҳәеит атәыла Ахада.
Екатерина Пешкова лыԥшәма Евгени Барченков еиҭеиҳәеит 30 шықәса раахыс Аԥсныҟа дшымаацыз, иазгәеиҭеит ирыҭаз адкылара ҟәанда игәы ишахәаз.
"Ҭабуп ҳәа шәасҳәарц сҭахуп гәык-ԥсык ала ҳахьшәыдышәкылаз азы. Аиҳаракгьы агәахәара снаҭеит ахәыҷқәа шаҳԥылаз. Ахәыҷқәа – ҳара уаҵәтәи ҳамш роуп", — иҳәеит иара.
Екатерина Пешковагьы ҭабуп ҳәа ахылҳәааит ирыҭаз агәцаракра. Иазгәалҭеит Аԥсны хәыҷгьы дугьы Максим Горьки ирҿиамҭақәа шырдыруа, ишрыԥхьо.
"Сара сзы ари насыԥуп. Зегьы ҭабуп ҳәа шәасҳәоит", — лҳәеит лара.
Аԥсны Акультура аминистр Ельвира Арсалиаԥҳа далацәажәеит Аԥсны Максим Горьки ихьӡ зху амузеи аартра азыԥхьагәаҭара атәы.
Акультураз Аԥсны Ахаадиабжьгаҩ Владимир Занҭариа иазгәеиҭеит ашәҟәыҩҩы ирҿиамҭақәа рылаҵәаны ишыҟоу.
Атәыла Ахада иҳәеит ҳабацәа ҳабдуцәа ишьақәдыргылаз акультуратә еимадарақәа рырӡра шыҟамло.
