АҞӘА, мшаԥы 18 – Sputnik. Аԥсны уаанӡатәи агәабзиарахьчара аминистр Андзор Гоов Sputnik аинтервиу аҭо далацәажәеит ихымԥадатәиу амедицинатә ԥгаԥсала Аԥсны атәылауаа Урыстәыла иахьаҵанакуа ацхыраара шроуа атәы. Иара иажәақәа рыла дарбанызаалак Аԥсны атәылауаҩ амедицинатә цхыраара аиура илшоит Урыстәыла иарбан ҭыԥзаалак аҿы.
Ачымазцәа ироуеит алшара иахьырҭаху аҭыԥ аҿы аҽыхәышәтәразы иҳәеит иара.
"Иара убри аан иҟоуп ашәара ачымазцәа зегьы Урыстәыла аҽыхәышәтәра алырхуеит ҳәа. Уи ҵаҵӷәык аманы иҟам. Аԥсны иҟоу аҳақьымцәагьы аҩаӡара бзиа рымоуп, ҳхәышәтәырҭақәагьы ишахәҭоу еиԥш, аамҭа аиқәшәо еиқәыршәоуп, урыстәылатәи ахәышәтәырҭақәа иреицәоуп узҳәом", — иҳәеит иара.
Ареспублика аиҳабыра Аԥсны иахьаҵанакуа иааиԥмырҟьаӡакәа инхо Урыстәыла атәылауаа амедицинатә ԥгаԥса рыҭаразы апрограмма анагӡара иазынанашьҭит хә-миллионк рҟынӡа аԥара.
Апрограмма ахықәкы – ареспублика иахьаҵанакуа аполисқәа рыҭарҭа ҭыԥқәа раартреи апунктқәа русура аиҿкаареи роуп. Аԥсны иахьаҵанакуа иаартхоит аполисқәа рыҭарҭа ҭыԥқәа быжьба.
Аԥсны Жәлар Реизара адепутатцәа Аԥсни Урыстәылеи рыбжьара иааиԥмырҟьаӡакәа Аԥсны аҵакыраҿ инхо Урыстәылатәи Афедерациа атәылауаа ихымԥадатәиу амедицинатә ԥгаԥса рыҭараз рнапы зҵарҩыз Аиқәшаҳаҭра аратификациа арҭеит 2017 шықәса жьҭаара 16 рзы.
Агәабзиарахьчара аминистрра адыррақәа рыла аполис рыҭахоит 190 000-ҩык рҟынӡа Аԥсны ауааԥсыра, 14 шықәса рҟынӡа зхымҵуа ахәыҷқәа аламҵакәа.
Аполисқәа Урыстәыла иахьаҵанакуа зегьынџьара азинмчра рымоуп.
