АҞӘА, мшаԥы 20 — Sputnik. Атәыла аиҳабыра еилыркаауеит ауааԥсыра агәынамӡарақәа шрымоу, уи аҳәара шырҭаху, аха уи иаанагом иҟауҵалак ҟалар алшоит ҳәа иҳәеит ателеканал "Шант" аинтервиу азҭаз, Ермантәыла Аԥыза-министр Серж Саргсиан. Абри атәы аанацҳауеит Sputnik Армения.
Иара иажәақәа рыла агәынамӡарақәа ыҟоуп, избанзар ауаа рыбзазара акыр илаҟәуп.
"Акыршықәса ҵуеит Ермантәыла иуҭаху аҳәара азин ыҟаны иҟоижьҭеи. Сгәы иаанагоит ауаагьы аиҳабырагьы рзы уи хәарҭоуп ҳәа", — иҳәеит Саргсиан.
Аха иара убри аан узхымсша ацәаҳәа шыҟоу удыруазароуп ҳәа ишьоит иара.
Саргсиан иажәақәа рыла аҭагылазаашьа шьақәҟьар зҭаху џьоукы уи аҵшәаара рҽаназыршәо, аҭак рыҭалатәуп, уи проблемоуп.
Аԥыза-министр иазгәеиҭеит азинхьчаратә органқәа акыр рхы нкыланы рыҽшымҩаԥырго, хаҭала иаргьы аполициа амч рхы иадырхәар ада ԥсыхәа ыҟамкәа иҟалар шиҭахым.
Мшаԥы 16, ашьыжь, асааҭ 8:15 инаркны Ереван аоппозициаа рықәгыларақәа рымҩаԥысра иалагеит. Амҩадуқәа аркхеит. Акциа рҽаладырхәит астудентцәа.
Ермантәыла аполициа абри инадҳәаланы аҳәамҭа ҟарҵеит Апарламент адепутат Никола Пашиниани иара идгылаҩцәеи ауааԥсыра рымаҵ ауразы ихымԥадатәины иҟоу амҩадуқәа адыркит ҳәа. Убри инадҳәаланы ауааԥсыра рконституциатә зин – рхы иақәиҭны аиҭанеиҭаҵааиҭаҵра еилаган ҳәа ишьоуп.
Аҵыхәтәантәи амшқәа рзы Ермантәыла аполициа аусзуҩцәа иааныркылеит акциақәа ирылахәыз 66-ҩык аоппозиционерцәа.
