АҞӘА, лаҵара 21 – Sputnik. Николас Мадуро атәыла Ахадас деиҭалхуп. Алхрақәа раан иара изы рыбжьы рҭиит 5,8 миллион-ҩык ауааԥсыра (68%), абри атәы аанацҳауеит РИА Новости алхратә милаҭтә хеилак Тибисаи Лусена лажәақәа ҵаҵӷәыс иганы.
"92,6% биуллетен рыԥхьаӡара ашьҭахьиҟалоит иуҳәар Николас Мадуро 5 823 718 бжьы иоуит ҳәа, аоппозициатә кандидат Енри Фалькон – 1 820 552 бжьы, Хавьер Бертуччи — 925 000 бжьы", — лҳәеит Лусена.
Аоппозициаа рлидер Енри Фалькон мап ацәикит алхрақәа рылҵшәақәа разхаҵара. Аиҭалхрақәагьы еиҿкаатәуп ҳәа аҳәамҭа ҟаиҵеит.
"Ҳара алхратә процесс иашам ҳәа иазаҳаԥхьаӡоит", — ҳәа иҩит аполитик Twitter аҿы.
Уи аҭакс Мадуро Фалькона ажәлар ҳаҭыр рықәиҵом ҳәа изиҳәеит.
Уаанӡа ЕАШ аҳәынҭқарратә Департамент Венесуела алхрақәа азакәаншьаҭа рымам ҳәа аҳәамҭа ҟанаҵахьан.
Абри адгылаар анаҭеит Аргентина, Чили, Алатын Америка атәылақәак рнапхгарақәагьы.
