АҞӘА, лаҵара 22 – Sputnik. Урыстәыла имҩаԥысуаз Андреи Стенин ихьӡ зху Жәларбжьаратәи ажурналистцәа рфотоконкурс аихшьаалақәа ҟаҵоуп, аиааира згаз рыхьӡқәа ӡыргоуп.
Жәларбжьаратәи аинформациатә маҵзура "Россия сегодня" еиҿнакааз, Урыстәыла имҩаԥысуаз Андреи Стенин ихьӡ зху жәларбжьаратәи ажурналистцәа рфотоконкурс аихшьаалақәа ҟаҵоуп, аиааира згаз рыхьӡқәа ӡыргоуп. Аԥхьанатә иалхын 14 тәыла рҟынтәи аԥыжәара згаз, аха аԥхьатәи ахҩык рахь иаҵанакит Урыстәыла, Иран, Беларуссиа рҟынтәи афотожурналистцәа.
Жәларбжьаратәи аинформациатә маҵзура "Россия сегодня" еиҿнакааз Андреи Стенин ихьӡ зху афотожурналистика Жәларбжьаратәи аиндаҭлара ажиури ахантәаҩыс дыҟоуп Ҭырқәтәылатәи амаҵзура Анадолу (Anadolu Ajansi) авидеожәабыжьқәеи афотосахьеи рыҟәша аиҳабы Аҳмеҭ Сел.Абри азы аинформациа аиура алшоит аконкурс асаит аҟәша "Победители – 2017" аҟны.
"Есышықәса аконкурс агеографиа аҽарҭбаауеит. 2018 шықәса рзы иара рҽаладырхәит 77 тәыла рҟынтәи афотожурналистцәа. Ицәырган 6000 усумҭа. Ҳара агәахәара ҳнаҭоит иахьатәи ҳаамҭазы афотосахьа актуалра аманы, еиуеиԥшым ауаа, атәылақәа, адунеи аҟны иҟоу аиҭакрақәа еилукаартә иахьунарбо, апроблемақәа ахьаанарԥшуа.Иахьатәи амш ҳара ҳзы акрызҵазкуа мшны иҟоуп. Иахьа, Стенин ихьӡ иаҵагыланы афотожурналистикахь зшьаҿа еихызгаз аҿар адунеи иадырдыруеит ргәы иҵхо, измырҭынчуа", — ҳәа азгәалҭеит аиндаҭлара акуратор Оксана Олеиник.
Андреи Стенин ихьӡ зху аиндаҭлара ажиури ахантәаҩы, афотомаҵзура Anadolu Ajansi анапхгаҩы Аҳмеҭ Сел иазгәеиҭеит аконкурсантцәа "рылаԥш ҵар".
"Аиндаҭлара аҵак ду аманы иҟоуп аҿар рзы. Аҿар рылаԥш ҵаруп, ихадоу алыркаауеит. Сынтәа иҟаз аусумҭақәа рҟынтәи ахазынаӡақәа ҳԥыхьашәеит. Аиндаҭлара алахәылацәа ирзеиӷьасшьарц сҭахуп ақәҿиарақәа", — иҳәеит иара.
Аҳмеҭ Сел иара убасгьы иазгәеиҭеит Андреи Стенин ихьӡ зху афотожурналистика Жәларбжьаратәи аконкурс хықәкны иамоуп ҳаамҭазтәи афотожурналистика ауаажәларра разхьарԥшра. Аиндаҭлара – жәларбжьаратәи афотоеилазаара афотожурналистикаҟны ахьыӡ ҿыцқәа ахьаадырԥшуа, астандартқәа ахьдырҿио, иахьышьақәдыргыло ҭыԥ заҵәыкны иҟоуп ҳәа.
"Жәларбжьаратәи аинформациатә маҵзура "Россия сегодня" еиҿнакааз Андреи Стенин ихьӡ зху афотожурналистика Жәларбжьаратәи аконкурс есышықәса еиҳа-еиҳа аҽарҭбаауеит, алахәылацәа рхыԥхьаӡара рацәахоит. Агәахәара унаҭоит апрофессионалцәа рыҩаӡара. Аимак аиҿак ахылҵыр алшоит иреиӷьу аусумҭақәа ралкаараан", ҳәа азгәеиҭеит иара.
Аконкурс иахьазы Урыстәыла ахьӡ ҿыцқәа аазыртуаны иҟоу конкурс заҵәыкуп. 2018 шықәса рзы аусумҭақәа алыркаауеит аноминациақәа ԥшьба рыла: "Главные новости", "Спорт", "Моя планета", "Портрет", Герой нашего времени". Иреиӷьу аусумҭақәа алыркаароуп 6000 рҟынӡа фотосахьа рҟынтәи.
Ииааиз рыхьыӡқәа ӡыргоуп 2018 шықәса лаҵарамза 22 рзы, аконкурс stenincontest.ru асаит аҟны.
Аинформациатә маҵзуреи арадиои Sputnik аиндаҭлара жәларбжьаратә информациатә партниорны иазыҟоуп.
