АҞӘА, рашәара 21 – Sputnik. Рашәара 20 рзы амшын аҟны иӡааҟәрылеит ҩыџьа астудентцәа. Абри аҭыԥ аҿы изныкымкәа амашәырқәа ҟалахьеит иҳәеит радио Sputnik аинтервиу азҭаз Аԥсны АҶА зхышәа-ҵышәа кьаҿу аӷбақәа Рҳәынҭқарратә инспекциа аиҳабы Ҭенгиз Сабуа.
Ҭенгиз Сабуа еиҭеиҳәеит адырра шроуҵәҟьаз АҶА аусзуҩцәа аҭыԥ ахь инеины аԥшаарақәа нап шрыларкыз.
"Аԥшаарақәа мҩаԥысуан ԥшь-сааҭк инарзынаԥшуа. Уахынланы аԥшаарақәа лыҵшәа шыҟарымҵоз дырны шьыжьнаҵы аԥшаарақәа хацҳаркып ҳәа адҵа ҟасҵеит. Шьыжьла амшын ҭынчуп, ицқьоуп", — иҳәеит иара.
Аԥшаарақәа хацзыркыз АҶА аӡхәыҵалаҩцәа аԥшьаша, рашәара 21, ашьыжь ирыԥшааит аԥсыбаҩқәа.
"Аҷкәынцәа ҭахеит. Кьылашәыр амшын иахьалало аҭыԥ аҿы АҶА аӡхәыҵалаҩцәа ирыԥшааит", — ҳәа еиҭеиҳәоит иара.
Иҭахаз ԥшаан амшын аҟәара 30 метра инацәхыкны.
"Абри аҭыԥ аҿы Кьылашәыр амшын иалалоит, аӡеилахәара ӷәӷәоуп", — иҳәеит иара.
Ҭенгиз Сабуа иажәақәа рыла аԥхынтәи асезон азы АҶА амшын аҟны ашәарҭадара иазку аилыркаагақәа рзеихыршоит ареспублика араионқәа зегьы.
Иара ишиҳәаз ала аҷкәынцәа ахьҭахаз аҭыԥ аҿы аиқәырхаҩцәа ыҟамызт.
"Ҳара ақалақь Ахадарахь адырра ҟаҳҵеит абри аҭыԥ аҿы аҽыкәабара азин ҟарымҵарц азы", — иҳәеит иара.
Сабуа ишиҳәаз ала ақалақь Ахадараҿ иалацәажәараны иҟоуп абри аҭыԥ аҿы адырга ҷыда ақәыргылара азҵаара.
Аиқәырхаҩ ареспублика ауааԥсыра адырра риҭоит аӡиасқәа амшын иахьалало аҭыԥқәа рҟны аҽыкәабара шыҟамло азы.
