АҞӘА, ԥхынгәы 10 – Sputnik. Аԥсни Урыстәылеи рыбжьара аусура иалагараны иҟаз адәыӷбақәа рхыԥхьаӡара еиҵатәын ачемпионат ахәаԥшыҩцәа рзы хәыда-ԥсада ибжьаҵаз адәыӷбақәа ирхырҟьаны иҳәеит радио Sputnik аинтервиу азҭаз АУН "Аԥснеихамҩа" апассаџьыртә маҵзура аиҳабы Емир Агрба.
Иара иажәақәа рыла адәыӷбацҵаҵәа рхыԥхьаӡара амаҷра апассаџьырцәа рхыԥхьаӡара ианымԥшит.
"Аԥсни Урыстәылеи рыбжьара аусура иалагараны иҟаз адәыӷбақәа рхыԥхьаӡара еиҵатәын ачемпионат ахәаԥшыҩцәа рзы хәыда-ԥсада ибжьаҵаз адәыӷбақәа ирхырҟьаны, аха уи апассаџьырцәа рхыԥхьаӡара ианымԥшит. 80% иаауа адәыӷбақәа ҭәуп", — иҳәеит иара.
Амаршрут хадақәа Москва — Аҟәа, Москва — Санкт-Петербург есыҽны иныҟәоит. Самаратәи амаршрут иҷыдоу амшқәа рзоуп ианныҟәо.
Агрба иажәақәа рыла уаанӡатәи ашықәсқәа ирыҿурԥшуазар, авагонқәа рҭагылазаашьа акыр еиӷьуп.
Иазыԥхьагәаҭаз аелектричка Адлер-Аҟәа аныҟәарагьы макьаназ иалацәажәоит ауп.
"Макьаназ иҟоу амаршрутқәа роуп аус здаауло" — иҳәоит Агрба.
2018 шықәсазтәи аԥхынтә сезон иаҿырԥшны Аусбарҭа анапхгара ишьақәдыргылоит ҽаантәи апланқәа.
