АҞӘА, ԥхынгәы 27 – Sputnik, Бадраҟ Аҩӡба. Акоммерциатә усура мҩаԥызго афармацевтикатә еиҿкаарақәа атәанчаҩцәа зыда ԥсыхәа рымамкәа иҟоу ахәшәқәа рыхәԥса еиҳа еиҵатәны ираадырхәалароуп атәанчаҩы иршаҳаҭга рыманы ианыҟоу иҳәеит Агәабзиарахьчара аминистр Ҭамаз Ҵахнакьиа.
Аминистр иазгәеиҭеит ахәшә ахәԥса 500 мааҭ рҟынӡа иҟазар атәанчахәы изы ахәԥса 25% еиҵатәтәуп, 500 мааҭ еиҳазар – 20% ҳәа.
"Адокумент азырхиоуп аҳәынҭқарра хаз иго атәылауаа ркатегориақәак асоциалтә цхыраара рыҭаразы имҩаԥнаго аполитика инақәыршәаны. Асиаҿ иануп 89 хәшәы-хкы", — иҳәеит иара.
Аминистр иара убасгьы иазгәеиҭеит атәанчаҩцәа ирырҭо ахәшәқәа аҭаҩра шырҭаху.
Агәабзиарахьчара аминистрра иаԥнаҵараны иҟоуп афармацевтикатә усура ахылаԥшразы Аусбарҭа аҟәша ҷыда. Дара хылаԥшра арҭалоит ақәҵара аусуреиԥш ахәшәқәа ааидкыланы рыҭирагьы ҳәа азгәеиҭеит аминистр.
