АҞӘА, нанҳәа 1 – Sputnik, Бадраҟ Аҩӡба. Аҿар ртеатр агәыҳалалратә спектакль "Ҳаԥсыуаауп, ҳаԥсыуаа!" мҩаԥысраны иҟоуп Самсон Ҷанба ихьӡ зху аԥсуа драматә театр аҿы нанҳәа 2 асааҭ 19:00 рзы лҳәеит Sputnik аинтервиу азҭаз, апроект "Иҭабуп Аиааиразы" анапхгаҩы Тамила Соломко.
"Кьараз" хылаԥшра ззыруа иреиуоуп аибашьра аветеранцәа рҭаацәарақәагьы. Ҳара иҳалшо зегь ҟаҳҵалоит аветеранцәа рыбзазара аиӷьтәразы", — лҳәеит Соломко.
Ҩынтәуп агәыҳалалратә спектакльқәа ддырбоижьҭеи. Аԥхьа ианымҩаԥгаз еизган 226 нызқь мааҭ лҳәеит лара.
"Ҳара ацхыраара зҭаху зегьы ҳашзырмыцхраауа еилаҳкаауеит. Аха ахшара рацәа змоу аветеранцәа, урҭ иҷыдан ирыцхраалатәуп" — лҳәеит апроект "Иҭабуп Аиааиразы" анапхгаҩы.
Тамила Соломко Аԥсны ауаажәлар рахь ааԥхьара ҟалҵеит агәыҳалалратә спектакль ахәаԥшразы инеирц.
"Даара иаҳҭахуп ажәлар абри апроект иадгыларц. Ҳидеиақәа ауаа рыда иҳазынагӡаӡом", — ҳәа азгәалҭеит лара.
Аԥсны жәлар Рџьынџьтәылатә еибашьра иалахәыз рзы агәыҳалалратә спектакль амҩаԥгара аԥшьнагеит ауаажәларратә еиҿкаара "Кьараз". Иара мҩаԥгахоит апроект "Иҭабуп Аиааиразы" аҳәаақәа ирҭагӡаны.
