АҞӘА, нанҳәа 24 – Sputnik. Урыстәыла атәылауаҩ лҽазылшәеит лыԥҳа лтәылауаҩшәҟы ала Аԥсныҟа ԥсшьара ҳәа даарц. Абри атәы аанацҳауеит ажәабжьтә портал "Кубанские новости".
55 шықәса зхыҵуаз аԥҳәыс аҳәаахьчаҩцәа агәра длыргарц даҿын апаспорт лара ишылтәу азы. Аха аҳәааҿы уи лымц лыҵырхит. Нас ишеилкаахаз ала, лара лтәылауаҩшәҟы аҩны инлыжьит.
"Аԥҳәыс лыԥҳа аԥсшьарамшқәа лоураны дыҟан. Лара фышықәса зхыҵуаз лхәыҷы длыманы Аԥсныҟа ԥсшьара аара лыгәҭакын, аха аусураҟны иаалырҟьаны аԥсшьарамшқәа лыҭара мап ацәыркит. Лара уаанӡа иаалхәахьаз абилеҭ лан илылҭеит, лхәыҷы длыманы Аԥсныҟа даарц. Иара убасгьы ан лыԥҳа лтәылауаҩшәҟы шьҭылхит", — ҳәа аҳәоит адырраҭараҿы.
Уажәы ашьаусҭҵаара алагара азҵаара иалацәажәоит.
