АҞӘА, нанҳәа 26 – Sputnik, Асмаҭ Ҵәыџьба. Аԥсуа фотоҭыхыҩцәа Ибрагим Чкадуеи Владимир Попови Аҟәатәи ацәыргақәҵатә зал аҿы еиҿыркааит афотоцәыргақәҵа – Аԥсны ахьыԥшымра азхаҵара амш азы.
Ацәыргақәҵа аалыртит Аԥсны акультуреи аҭоурых-культуратә ҭынха ахьчареи рминистр Ельвира Арсалиа. Лара лажәақәа рыла афотоқәа Аԥсны еиҳа иналукааша аҭоурыхтә хҭысқәа аадырԥшуеит.
"Афотоқәа зегьы хҭыск-хҭыск ирҿахәҳәагоуп. Ҳавторцәа иуникалтәу аматериал еидыргалеит. Афотосахьақәа реиҳарак раамҭа иасимволны ауаа ргәалашәарақәа ирзаанхеит", — лҳәеит лара.
Афотосахьақәа хронологиатә еишьҭагыларыла аҭааҩцәа ирзеиҭарҳәон Аԥсны иахьатәи аҭоурых. 25 шықәса рыҩныҵҟа афотоҭыхыҩцәа рҽазыршәон иналукааша атәылаҿ имҩаԥысуаз ахҭысқәа раарԥшра.
"Ҳҭоурых, ҳаԥсҭазаараҿы еиҳа иналукааша хҭысны иҟалеит ахьыԥшымра азхаҵара. Аха уаанӡагьы имаҷӡамызт азхьаԥшра зҭахны иҟаз ахҭысқәа. Ибрагими сареи иаххәҭаны иааҳаԥхьаӡоз зегьы ҭаҳхуан. Аҭоурых ишазныжьтәыз еилаҳкаауан", — иҳәеит ацәыргақәҵа авторцәа руаӡәк, Владимир Попов.
Ацәыргақәҵа аҭааҩ, ажурналист Инал Ҳашыг иажәақәа рыла афотосахьақәа ибзиаӡаны ирныԥшуеит аибашьрашьҭахьтәи атмосфера.
"Афотосахьақәа ирнубаалоит Аԥсны аибашьра ашьҭахь изнысыз амҩа. Агәырӷьарагьы ауадаҩрагьы. Абар, Арӡынбеи Березовскии реиԥылара. Афото ҭыхын 1997 шықәса рзы. Усҟан атәыла аблокада адҟаҵалан ирыман. Икылкаан уахәаԥшыр иубоит аишәа ишықәгылоу аҩнынтәи иаагоу ашәыр, ахаа-мыхаа. Усҟан аҳәынҭқарра абасеиԥш аишәархиаразгьы аԥара амамызт", — иҳәоит иара.
Аҭыԥ ҷыда рымоуп Кәыдрытәи ахҭысқәа афотосахьақәа рҿы. Афотоҭыхыҩцәа ирылшоз зегь ҟарҵон, рҟазара рхы иадырхәон уи аамҭазтәи атмосфера аарԥшразы. Иара убри аан фотосахьакгьы рыхьӡ аҵаҩым.
Аԥсуа фотоҭыхыҩцәа Ибрагим Чкадуеи Владимир Попови Аҟәатәи ацәыргақәҵатә зал аҿы еиҿыркааит афотоцәыргақәҵа – Аԥсны ахьыԥшымра азхаҵара амш азы. Ацәыргақәҵа аартуп цәыббра хәба рҟынӡа. Жьҭаарамзазы афотосахьақәа ӡыргахоит ажурналистцәа рфорум "Вся Россия" аҟны, Шәача.
