АҞӘА, нанҳәа 31– Sputnik, Бадри Есиава. Ашьапылампыл азы ачемпионат амҩаԥгара абиуџьет заа ишьақәыргылоуп, аха ашьапылампылтә клубқәа урҭ алшарақәа рҳәаақәа ианырҭыҵуа ыҟоуп иҳәеит Аԥсны Ахада Рауль Ҳаџьымба апресс-конференциаҿы, ахәаша, нанҳәа 30 рзы.
"Ашьапылампыл азы ачемпионат амҩаԥгара абиуџьет заа ишьақәыргылоуп, аха ашьапылампылтә клубқәа урҭ алшарақәа рҳәаақәа ианырҭыҵуа ыҟоуп. Ашьапылампыл, ҳәарада, ирҿиалатәуп, аха сара иазгәасҭар сҭахуп аклубқәа раԥҵараан иахәҭоу зегь аҳәынҭқарра абӷа ақәҵара аҭахым ҳәа. Ианҳалшо аӡәгьы мап ицәаҳкӡом", — иҳәеит иара.
Ахәыҷтәы шьапылампыл акәзар, уи иацу апроблемақәагьы рылацәажәаразы ашьапылампылтә клуб "Динамо" апрезидент Асҭамыр Адлеиба иахь азҵаарақәа шәырха иҳәеит иара. Абри ахырхарҭаҿ аҿиара шымҩаԥысуеи аҵыхәтәантәи ашықәсқәа рзы аколлективқәа заҟа аԥҵои ртәы Адлеибеи егьырҭ аклубцәа рнапхгаҩцәеи еиҳа иныҭкааны ирдыруеит ҳәа азгәеиҭеит Ахада.
