АҞӘА, цәыббра 5— Sputnik. Ашьшьара зыхҟьаз иазкны ицәырҵит еиуеиԥшымыз агәаанагарақәа: адиверсиа инаркны аметиорит аахара аҟынӡа. Иаԥҵаз "Роскосмос" акомиссиа аҭҵаара иаҿын акосмостә ӷба иаиуз амалыр зыхҟьаз амзыз. Иара убасгьы урыстәылатәи акосмостә корпорациа "Энергия" акомиссиагьы аус ауан. Уажәазы ишьақәыргылоуп иҟалаз зыхҟьаз ацех аҟны аибыҭаратә усурақәа раан ааха иаиуз ауп ҳәа. Усҟан ашьшьара аҷабга ҷыдала иршьыхит. Иахьазы ишьақәыргылам абри ахҭыс агәаҭаратә бӷьыц аҟны иарбазу иарбамзу.
Уаанӡатәи адырраҭарақәа рыла, аҳәынҭкорпорациа "Роскосмос", Аракета-космостә корпорациа "Энергия", аҭҵаарадырратә институт ЦНИИмаш иҟоу аҭагылазаашьа инадҳәаланы акомиссиа ҷыда аԥырҵеит.
"Адгьыл аҟны акәзар амалыр ахьаиуз ҳәа иҟоу агәаанагарагьы ҭаҳҵаауеит. Аха иҟоуп аҽа версиакгьы: акосмос аҿы гәҭакрыла ааха аҟаҵара. Уа усеиԥш иҟоу ашьҭақәа аҭыԥ рымоуп", — иҳәахьан уаанӡа аҳәынҭкорпорациа "Роскосмос" аиҳабы Дмитри Рогозин.
Иара убри аан "Роскосмос" ахада иазгәеиҭеит "Союз" иаиуз аԥырхага аметеорит ишахарам.
"Аметеорит аверсиа мап ацәаҳкит. Ааха ахьыҟалаз аӷба аҩныҵҟалоуп. Аха макьаназ иҟалаз шыҟалаз ҳзышьақәмыргылацт", — иҳәеит Рогозин.
Аԥшьаша ауха МКС аҟны аҳауацәцара шымҩаԥысуаз рбеит. Аекипаж аӷба анҭырҵаа ашьҭахь ишьақәдыргылеит "Союз МС-09" ахәҭаҿы ашьшьара шыҟаз. Албаашьҭыга аппарат аҿы акәзар шәарҭа ыҟам. Убри азы аекипаж Адгьыл ахь рыхынҳәра аҭаххар ԥынгыла роуам.
