АҞӘА, цәыббра 24– Sputnik. Мчыбжьык аҩныҵҟа Урыстәылатәи аган Шьамтәылатәи аган иазынанашьҭраны иҟоуп ҳаамҭазтәи аҳауаҽацәыхьчаратә комплексқәа С-300 иҳәеит Урыстәыла Атәылахьчара аминистр Сергеи Шоигу ҳәа аанацҳауеит РИА Новости.
"Мчыбжьык аҩныҵҟа Урыстәылатәи аган Шьамтәылатәи аган иазынанашьҭраны иҟоуп ҳаамҭазтәи аҳауаҽацәыхьчаратә зениттә-ракетатә комплексқәа С-300. Иара иамоуп алшара 250 километра аҟынӡа ахьыбжьоу ақәылараз ишьҭу амыруга аанкылара", — иҳәеит иара.
Шоигу иажәақәа рыла, С-300 Шьамтәылатәи ПВО алшарақәа акыр иарӷәӷәоит.
Аминистр иҳәеит 2013 шықәса рзы Урыстәыла ишааннакылаз Дамаск акомплексқәа С-300 азынашьҭра, аха уажәы аҭагылазаашьа аҽаԥсахит, уи азы Москва хара адым ҳәа.
Уи адагьы Урыстәыла Шьамтәылаҟа инанашьҭраны иҟоуп ҳаамҭазтәи ПВО акомандатә пунктқәа рзы анапхгаратә системақәа.
"Урыстәыла Шьамтәылаҟа инанашьҭраны иҟоуп ҳаамҭазтәи ПВО акомандатә пунктқәа рзы анапхгаратә системақәа. Асистемақәа иалдыршоит Шьамтәыла ПВОқәа зегьы ҭыԥк аҟынтәи анапхгара рыҭара аиҿкаара, аҳауатә ҭагылазаашьа амониторинг азура", — иҳәеит Шоигу.
Иара иҳәеит Шьамтәыла иаԥну Адгьылбжьаратә мшын акваториаҿы Урыстәыла атәыла иахьаҵанакуа аобиектқәа ирыжәло аспутниктә навигациақәеи, авиациа аборттә радиолакациатә системақәеи аимадарақәеи шашьаҽуа.
Шоигу иҳәеит Москва Израиль иҟанаҵаз аҭактә уснагӡатәқәа аднамкылар ада ԥсыхәа шыҟам урыстәылатәи аруаа ршәарҭадара аиҿкааразы.
Шоигу игәаанагарала Урыстәыла ашьаҿақәа "ауаа рхы аҭыԥ иҭанартәоит".
"Ус анакәымха иҟало аҭагылазаашьа инақәыршәаны ҳхы мҩаԥаагалоит", — иҳәеит аминистр.
Цәыббра 17 асааҭ 23:00 рзы авиабаза Хмеимим ахь ихынҳәуаз урыстәылатәи аҳаирплан Ил-20 арадарқәа рҟны ибжьаӡит. Аҳаирплан аекипаж 14-ҩык ыҟан.
Атәылахьчара аминистрра адыррақәа рыла иара убри аамҭазы израильтәи аистребительқәа F-16 Латакиа шьамтәылатәи аобиектқәа ирылахысуан, афранцузтә фрегат "Овернь" (Auvergne) аҟынтәи аракетақәа рышьҭуан. Шьамтәылатәи аҳауаҿагыларатә шьақәгылақәа аҳаирплан карыжьит. Иҭахеит аекипаж зегьы.
Израиль ахара Дамаск, Иран, ливантәи аиҿкаара "Хезболла" ирықәнаҵеит.
