АҞӘА, жьҭаара 11 – Sputnik, Бадраҟ Аҩӡба. Аԥснытәи альпинистка Ирина Алаева Непалтәи ашьха Манаслу дхалеит. Ашьха аҳаракыра аа-нызқь метра еиҳауп. Абри атәы Sputnik иазеиҭалҳәеит альпинистка лхаҭа.
Ирина Алаева шьҭрала д-Аԥснытәиуп. Ашьхақәа рыбзиабарагьы Аԥсноуп иахьлызцәырҵыз. Ишылҳәо ала, дшыхәыҷыз лаб дицны ашьхаҟа дцалон.
"Ҩажәа шықәса схыҵаанӡа Аԥсны сынхон, 12-тәи ашкол салгеит. Саныхәыҷыз еснагь ашьхаҟа ҳцон", ҳәа еиҭалҳәоит лара.
Ирина Урыстәылатәи абаҩрҵәыра аинститут далгеит.
Лара агәыԥқәа дрылахәны еиԥш лхалагьы ашьха дхалахьеит.
"Ельбрус схала схалеит", — лҳәоит лара.
Манаслу дхалаанӡа Ирина ашьха Мера Пик дхалеит. Манаслу ахалара акыр имариамыз усын ҳәа лҳәоит альпинистка.
"Ашьха зхалара уадаҩу ҳәа иршьоит. Ирацәаны аҭшәаррақәеи ашьшьарақәеи амоуп" ҳәа еиҭалҳәоит.
Манаслу Ирина Алаева дхалеит непалтәи амҩаԥгаҩ дицны, атурист фирмақәа руак далахәны.
"Аекспедициа мызкы иназынаԥшуа имҩаԥысуан", — ҳәа еиҭалҳәоит лара.
Ашьха ақәцәа аҟазаара, ауадаҩрақәа риааира даара игәышьҭыхгоуп лҳәоит альпинистка.
"Еиуеиԥшым ацәаныррақәа узцәырҵуеит. Агәахәара дуӡӡа сыман ашьха аиааира ахьсылшаз. Ҳәарада, асеиԥш ақәцәахь анеира уацәшәартә иҟоуп, аха уи ахьулшо гәадуроуп", — ҳәа азгәалҭеит Ирина Алаева.
Манаслу ашьха ақәцәахь Ирина днеиит цәыббра 29 рзы.
Непал иҟоу ашьха Манаслу (Manaslu, 8156 м) адунеиаҿы реиҳа иҳараку ашьхақәа иреиуоуп. Ахьӡ аауеит асанскритсттә ажәа Manasa (адоуҳа, аԥсы) аҟынтәи.
Иара убасгьы ашьха иамоуп аҽа хьӡык — Кутанг (Kutang).
