АҞӘА, жьҭаара 26 – Sputnik, Бадраҟ Аҩӡба. Ареис Москва-Аҟәа аанкылоуп адәыӷбамҩа аӡы иахьыҵнашәааз азыҳәа Sputnik иазааицҳаит АУН "Аԥсныеихамҩа" аиҳабы ихаҭыԥуаҩ Игор Марганиа.
"Ауаа аҭыԥ аҿы абилеҭқәа дырхынҳәыр рылшоит. Адәыӷба Москва-Аҟәа аҳҭнықалақь адәыӷбаанҿасырҭаҿ иаараны иҟан жьҭаара 26 асааҭ 10:28 рзы. Шьҭахьҟа ихынҳәыр акәын асааҭ 13:29 рзы", — иҳәеит иара.
Адәыӷба № 305 Москва-Аҟәа жьҭаара 25 рзы адәыӷбаанҿасырҭа Краснодар-2 аҟынӡа иааӡеит. Уи нахыс амҩа изацнамҵеит Тҟәаԥс иахьаҵанакуаз адәыӷбамҩа аӡы иахьықәнаӡәӡәааз иахҟьаны.
Иара убасгьы амҩахәҭа Гречески — Тҟәаԥс аҿы 200 метра рҟынӡа амҩа ҳәазеит, амҩахәҭа Гречески-Кривенковскаиа аҿы аӡы амҩа ҵнашәааит. Уажәазы иҟоу аҭагылазаашьа аԥыхразы аусурақәа ирҿуп.
