Ажәлар ацәгьа иацәихьчон, абзиарахь ихьаирԥшуан: Заур Чычба идунеи иԥсахит

Анапаҵаҩра
НовостиTelegram
Аԥсуаа ҳзы даараӡа акраҵанакуеит аныха амч. Уи аӡбахә, "алԥха ҳамазааит" мҳәакәа ҳалацәажәаӡом. Аныхаԥааҩцәа ракәзар, ҳаԥсҭазаараҟны ицәырҵуа ауадаҩрақәа, арыцҳарақәа рыӡбареи, риааиреи рҟны иҳавагылоуп.

Арҭ амшқәа рзы адунеи зыԥсахыз Дыдрыԥшь ныха ахылаԥшҩы Заур Чычба ҳауаажәлар рыдагьы, иҩызцәа аныхаԥааҩцәа рзгьы иҟәышыз, амҩа иаша иқәызҵоз иакәны дыҟан. Заур Чычба инапы злакыз аус ҭакԥхықәрала дшазнеиуаз, иуаажәлар рхьа шихьааз, абзиарахь ишхьаирԥшуаз атәы ҳзеиҭеиҳәеит ибзиаӡаны дыздыруаз Лӡааныха ахылаԥшҩы Владимир Гәочуа.

Sputnik, Саида Жьиԥҳа

Заур Чычба Аԥсны Аџьынџьтәылатә еибашьра ҟалаанӡагьы Дыдрыԥшь-ныха дахагылан. Иара иҟны инеихьан шәҩыла ахҿыхреи, ахныҳәареи иашьҭаз ауаа.

Анкьа убас еиԥш аамҭақәа ыҟан, аԥсуаа жәла-жәлала аколнхара ҳшаламло ҳәа аныхақәа рҟны инеины ианбӷоз. Аха, наҟ-наҟ уи рԥырхагахо иалагеит, избанзар иқәит, арахь иаламлар амуа аҭагылазаашьа иақәдыршәеит. Иҟалон еибаргәаауаз, мамзаргьы аимак-аиҿак зыбжьалоз аигәылацәа, аиуацәа анбӷоз. Аҵыхәтәантәи ашықәсқәа рзы даара ирацәаҩхеит Заур Чычбеи, иара егьырҭ аныхаԥааҩцәагьы рҟны инеины зхы ҿызхыз ажәлақәа.

"Заур Чычба идҵаалоз ауаа иус рдыруан, иқәгәыӷуан. Иаргьы даара дуаҩы ҟәымшәышәын, еиуеиԥшым ауадаҩрақәеи агәаҟрақәеи змаз рхьаа рыцеиҩишон, иныҳәон, иҿихуан. Ҳныхақәа зегьы амч рымоуп, аха Дыдрыԥшь еиҳа ҷыдалатәи агәрагара арҭон ҳажәлар", — иҳәоит бжьышықәса раахыс Лӡааныха иахылаԥшуа Владимир Гәочуа.

Аныхаԥааҩцәа лассы-лассы еиқәшәалон, еиҭанаиааиуан, ажәлар рныҳәара иадҳәалаз азҵаарақәа ирылацәажәон.

Лӡаа-ныха ахылаԥшҩы Владимир Гәочуа - Sputnik Аҧсны
Владимир Гәачуа: аныхақәа шеиҿцаауаз збеит

"Ижәдыруеит нас, аныхаԥааҩцәа зегьы ҳбыргцәоуп, аха зегь раасҭа сара еиҳа сықәра еиҵоуп, амашьына ныҟәысцаратәы сыҟоуп. Аԥсны ахыи-аҵыхәи џьара аныхақәа рызҵаара ианалацәажәатәыз, Заур аҭел дысзасуан, машьынала ҳаиццон. Убас лассы-лассы ҳаибабон, ҳаицхыраауан, ҳаизҵаауан. Лӡаа-ныха санахагылагьы, иара иакәын абжьгаҩыс исымаз. Заур ибзоурала, қәнагала сыуаажәлар рымаҵ аура сылшеит", — ҳәа азгәеиҭоит аныхаԥааҩ Владимир Гәочуа.

Аԥсны Аџьынџьтәылатә еибашьра анцоз, Владислав Арӡынба изныкымкәа Заур Чычба дидҵаалахьан, ажәлар рныҳәарақәа мҩаԥыргахьан.

Рыҩџьагьы ирыбзоураны аԥсы ҭалеит, еиҿкаахеит хылаԥшрада иҟаз Ԥсҳәытәи Инал-ҟәыба аныхагьы. Иаҭаахьан, Аԥсны анҭыҵ Быҭҳа иҟоу аныха. Убри ахылаԥшҩы иахаргылара, ҳажәлар ианырҭаху уахь инеиртә еиԥш аҭагылазаашьа аԥҵара акәын аҵыхәтәантәи аамҭазы дзызхәыцуаз.

Заур Чычбеи егьырҭ аныхаԥааҩцәеи рзеиԥшӡбарала шықәсқәак ҵуеит аныхақәа рҟны ашәира аԥыхыуижьҭеи.

Ажәабжьқәа зегьы
0