Аинар Ҷыҭанаа, Sputnik
Ажурналист лныҳәа иазкыз ахәылԥазы еиҿкаан Аҳәынҭқарратә Телерадиоеилахәыра ахыбраҿы. Уи рхы аладырхәит кыр шықәса аиубилиар аус лыцызуз лҩызцәа ажурналистцәа, иара убас ААУ афилологиатә факультет ажурналистика аҟәша 3-тәи акурс астудентцәа.
Астолгежь иалахәыз аиҳабыратә абиԥара "актәи аҿаԥыц аҟынтәи" еизаз ирзеиҭарҳәеит рколлега лжурналист ԥсҭазаара иацыз ахынҭа-ҩынҭарақәеи ауадаҩрақәеи ртәы.
"Екатерина Бебиаԥҳа лырҿиаратә мҩа зегьы алацәажәара ҳалагар иахьатәи амш ҳзымхар ҳәа сшәоит, - иҳәеит ажурналист Оҭар Лакрба- Ҳара астудент шықәсқәа раахыс ҳаибадыруеит. Усҟангьы илылаз аҟыбаҩ ала сара ҩашьарада издырхьан дышҵарауаҩ духо, дшышәҟәыҩҩхо. Лара ажурналистика дҭамларгьы ҳәарада ирыцҳара духон".
Аԥсуа радио аиҳабы Алина Ачԥҳа далацәажәеит Екатерина Гьаргь-иԥҳа лырҿиаратә ҟазшьақәа рыдагьы аԥсҭазазаара иалыргаз реиҩызарагьы.
"Екатерина адәысакараҿы дуртәаргьы аԥслымӡ иалхны ахан еихачаԥа лыргылоит. Лбаҩхатәра ҵҩа амаӡам", - лҳәеит лара.
Анаҩс ажәа рыман ақәыԥшцәагьы. Ахәылԥаз зхы алазырхәыз ажурналистика 3-тәи акурс астудентцәа рыхьӡ ала дцәажәеит Линда Ԥлиаԥҳа.
"Иҭабуп ҳәа шәасҳәоит Екатерина Гьаргь-иԥҳа, рҵаҩык леиԥш акәымкәа, еснагь анык леиԥш шәахьҳавагыло. Сгәыӷуеит иҳадыжәбало аџьабаа ҳмырӡып, ҳаԥхьаҟа уи ҳҽаԥсаҳтәып ҳәа", - лҳәеит лара.
Ахәылԥаз актәи ахәҭа анхыркәшаха, еиҳа мҽхакыҭбаала аҩбатәи ахәҭа мҩаԥган Атриум Викториа аиҿцәажәаратә уадаҿы. Араҟа аҭааҩцәа рзы еиҿкаан аиубилиар лышәҟәқәа рцәыргақәҵа, аибашьраан лара иҭылхыз афотосахьақәа рыла ихарҭәааны. Иара убас ари ахәылԥаз аҿы иӡырган Екатерина Бебиаԥҳа лышәҟә ҿыц "Сара Сдунеи". Уи ианылеит шамахамзар уажәаԥҳьа акьыԥхь зымбацыз ажәеинраалақәа, аԥсҭазааратә жәабжьқәа, асценари, игәылыршәоу ахшыҩҵакқәа, астатиақәа.
![Творческий вечер ко дню рождения Заслуженного журналиста Абхазии Екатерины Бебия Творческий вечер ко дню рождения Заслуженного журналиста Абхазии Екатерины Бебия - Sputnik Аҧсны](https://cdnn1.img.sputnik-abkhazia.info/img/102570/18/1025701825_0:0:1000:630_600x0_80_0_0_4ecacefd8beb97507b7331a9f28121b9.jpg)
![Творческий вечер ко дню рождения Заслуженного журналиста Абхазии Екатерины Бебия Творческий вечер ко дню рождения Заслуженного журналиста Абхазии Екатерины Бебия - Sputnik Аҧсны](https://cdnn1.img.sputnik-abkhazia.info/img/102570/19/1025701917_0:38:1000:667_600x0_80_0_0_72e19c2ef9646ae6690a678dac7cb6ff.jpg)
![Творческий вечер ко дню рождения Заслуженного журналиста Абхазии Екатерины Бебия Творческий вечер ко дню рождения Заслуженного журналиста Абхазии Екатерины Бебия - Sputnik Аҧсны](https://cdnn1.img.sputnik-abkhazia.info/img/102570/20/1025702063_0:0:1000:630_600x0_80_0_0_41e9a8a094a37199dc7eed1583bcc09c.jpg)
![Творческий вечер ко дню рождения Заслуженного журналиста Абхазии Екатерины Бебия Творческий вечер ко дню рождения Заслуженного журналиста Абхазии Екатерины Бебия - Sputnik Аҧсны](https://cdnn1.img.sputnik-abkhazia.info/img/102570/19/1025701997_0:0:1000:630_600x0_80_0_0_9e2b9bb8bd897c4fcb673b2abb8d9746.jpg)
![Екатерина Бебия Екатерина Бебия - Sputnik Аҧсны](https://cdnn1.img.sputnik-abkhazia.info/img/102569/56/1025695608_0:38:1000:667_600x0_80_0_0_47a3ba361f95a8dc0af8584342022382.jpg)
Ашәҟәаҿы лара илыҩуеит абас еиԥш ацәаҳәақәа. "Ажәеинраалақәа рыҩра сара сзыҳәа иԥсыршьагоуп. Уи сҳәеит ҳәа, ажурналистика сара сзыҳәа иџьабаауп ҳәа исыԥхьаӡаӡом. Аҩра-сара исыԥсҭазаароуп! Санымыҩуа ауп сара сзы ианџьабаау".
Ажурналист Анна Гәниаԥҳа "Екатерина Гьаргь-иԥҳа ԥсшьара дцаргьы анҵамҭа аалгоит" ҳәа илҳәаз ажәақәа хыхь иаагоу ахшыҩҵак иазааигәоуп. Ахы аус адулара дуӡӡа иабзоуразар акәхап Бебиаԥҳа хыԥхьаӡара рацәала ашәҟәқәеи ателедырраҭарақәеи уҳәа дахьравторугьы. "Ианҵоу-ыӡӡом, зыԥсы ҭоу баҟоуп" ҳәа еснагь лара лажәа иалоуп.
Аԥсны ашәҟәыҩҩцәа Реидгыла алитературатә фонд ахьӡала аиубилиар длыдныҳәалеит апоетесса Гәында Кәыҵниаԥҳа.
"Екатерина Бебиаԥҳа- ҳаамҭазтәи фырԥҳәызбоуп, избанзар арҭ ашықәсқәа ирҭагӡаны илыллыршаз аӡәгьы илымшазар ҟалап. Лара лырҿиара – даҽакы иуцәаламҩашьо, хазы игоу цәырҵроуп", - лҳәеит лара.
Екатерина Гьаргь-иԥҳа длыдныҳәаларц Москвантәи дааит Урыстәыла зҽаԥсазтәыз азинҭҵааҩы, ауаажәларратә усзуҩы Тарас Мирон-иԥа Шамба. Иара ицәажәараҿы иазгәеиҭеит зус иазҟазоу ауаҩ иеиԥш адагьы, ҭаацәашәалагьы аиубилиар уаалыҵашьыцыртә анасыԥ ду шлымо.
"Лырҿиаратә ԥсҭазаараҿы акәзаргьы иахьынӡалықәҿиаз лышәҟәқәеи, лыҭҵаарадырратә усумҭақәеи, лтелеархиви идырҵабыргуеит. Лара лџьабаа уанахәаԥшлакь институт дук иатәу џьушьоит, убри аҟара амҽхак ҭбаауп, лгәы-лыԥсы иагәылгоуп ", - иҳәеит иара.
Екатерина Бебиаԥҳа Аԥсны ашәҟәыҩҩцәа Реидгылеи ажурналистцәа Реидгылеи далахәылоуп. Иара убас лара илыхҵоуп "Аԥсны Аҳәынҭқарра Зҽаԥсазтәыз ажурналист", "Иреиҳаӡоу аҵараиурҭа зҽаԥсазтәыз аусзуҩы" ҳәа ахьӡ ҳаракқәа. Аԥсны Аџьынџьтәылатә еибашьраан иаалырԥшыз афырхаҵаразы иланашьоуп "Агәымшәаразы" амедаль. Аԥсны Ателерадиожурналистика ашьақәгылараҿы ллагалазы иланашьоуп "Ахьӡ-Аԥша" аорден 3-тәи аҩаӡара, атәылахьчара Аминистрра амедалқәа.