АҞӘА, ԥхынҷкәын 5 – Sputnik. Алианс амаӡаныҟәгаҩ хада Иенс Столтенберг аҳәамҭа ҟаиҵеит Бриуссель имҩаԥысуаз аилатәараҿы Украинеи Қырҭтәылеи НАТО ралалара аԥеиԥш бзиа аманы ишахәаԥшыз ҳәа аанацҳаит РИА Новости.
"Ҳара ишьақәҳарӷәӷәеит НАТО-и Украинеи реизыҟазаашьа бзиа. Ҳара адгылара аҳҭоит Украина алианс алалара ахьаҭаху. Уи азы иахәҭаны иҟоу ареформақәа рҟны апрогресс бзиа ыҟоуп. Иара убри аан апроблемақәа зегьы рҭыԥ иқәҵам. Убри инадҳәаланы Украинахь ааԥхьара ҟаҳҵоит арҭ ареформақәа ԥхьаҟагьы ирықәныҟәаларц", — иҳәеит амаӡаныҟәгаҩ хада.
Қырҭтәыла азҵаара далацәажәо иара иҳәеит:
"Иара убасгьы ҳара адгылара ду аҳҭоит Қырҭтәыла алианс алалара хықәкыс иахьамоу. Иахьатәи ҳаиқәшәараҟны ҳалацәажәеит Қырҭтәыла алианс алалараз азыҟаҵара ишацҵахо атәы. Уи азы иахәҭаны иҟоу ареформақәа рҟны апрогресс бзиа ыҟоуп. Ҳара Қырҭтәыла ҭабуп ҳәа аҳҳәоит Афганисҭантәи ҳмиссиа алагала ду ианаҭо азы", — иҳәеит Столтенберг.
Қырҭтәылеи НАТО-и русеицура хацыркхеит 1994 шықәса рзы, атәыла апрограмма "Партнерство ради мира" ианалахәха ашьҭахь. 2008 шықәса рзы Бухарест, НАТО асаммит аҿы аҳәамҭа ҟаҵан Қырҭтәыла ԥхьаҟа, НАТО астандартқәа ирықәшәо иҟалар алианс иалалар шауа.
