АҞӘА, ԥхынҷкәын 6 — Sputnik. Украина амилаҭтә шәарҭадареи атәылахьчареи Рхеилак аиҳабы Александр Турчинов аҳәамҭа ҟаиҵеит Украина Амшын еиқәаҿ амҵәыжәҩа змоу аракета ҿыцқәа ԥнашәеит, урҭ рыла Азовтәи амшыни Амшын еиқәеи рыԥшаҳәатә цәаҳәа арӷәӷәара агәҭакуп ҳәа. Абри атәы аанацҳаит РИА Новости.
"Иахьа иҭаҳҵаауан аракетақәа рыԥырра ахарареи ацәҟьара рақәшәареи. Иҟаҵаз аихшьаалақәа рыла С-125 акыр хра рыманы рхы аадырԥшит", — иҳәоит Турчинов.
Украина амилаҭтә шәарҭадареи атәылахьчареи Рхеилак аиҳабы Александр Турчинов аԥышәарақәа аныхдыркәша ашьҭахь аилацәажәара мҩаԥигеит аракетатә техника аус адулаҩцәеи арратә напхгареи алархәны.
Аԥышәарақәа мҩаԥган Амшын еиқәаҿ аҭыԥ змаз аҳәааеилагара ахҭыс ашьҭахь. Уи Киеви Москвеи реизыҟазаашьақәа еиҳагьы еибанарххеит.
Украинатәи арратә ӷбақәа — "Бердянск", "Никополь", "Яна Капу" — абҵара 25 рзы Урыстәыла аҳәаа еиларгеит. Аӷбақәеи аекипажи аанкылан.
