АҞӘА, ԥхынҷкәын 13– Sputnik. Аҳәынҭавтоинспекциа аусзуҩцәа автомашьына анааныркылоз абџьар рхы иадырхәеит ҳәа Sputnik иазеиҭеиҳәеит Аԥсны апрокурор хада ицхырааҩ Даур Амҷба.
"Аҩаша, ԥхынҷкәын 11 рзы Очамчыратәи аҩныҵҟатәи аусқәа русбарҭа аҟәша аусзуҩцәа аоперативтә информациа аус адуло аҳәынҭавтоинспекциа Тамшьтәи апост аҿы игылан. Ареидтә уснагӡатәқәа раан автомобиль ВАЗ-2114 аангыларц адҵа ҟарҵеит. Ирымаз аинформациала, амашьынаҿ иҟан уаанӡа аусӡбара иақәшәахьаз, анаркотикатә маҭәашьарқәа мҩанызгоз ауаа", — иҳәеит иара.
ВАЗ аԥсҟы зкыз иҭаз адырра дықәымныҟәеит, амашьына аанимкылеит.
"Автомобиль аанымгылакәа ианраҩс амилициа аусзуҩцәа ашьҭалеит. Бжьынтә рҟынӡа ажәҩан ахь абџьар ахы рханы ихысит", — иҳәеит Амҷба.
Ахқәа руак амашьына асалон иақәшәеит, апассаџьырцәа руаӡәы дхәуп.
"Уаанӡа аусӡбара иақәшәахьаз Ҵәыџьбак ахы иқәшәеит. Амашьына амҩа ианыҵны ажра иҭаҳаит. Ахәы ахәышәтәырҭахь днаганы аоперациа изыруит. Иԥсҭазаара шәараҭа амам", — иҳәеит апрокурор ицхырааҩ.
Автомашьынаҿ иԥшаан анаркотикатә маҭәашьар. Уи аекспертизахь инашьҭуп.
Очамчыра арион апрокуратура абџьар ахархәара азакәаншьаҭа агәаҭара мҩаԥыргоит.
