АҞӘА, ԥхынҷкәын 17– Sputnik, Бадраҟ Аҩӡба. Очамчыратәи акоманда "Гиуенос" раԥхьаӡа акәны амҵәышәымпыл азы Аԥсны иачемпионхеит аҳәса рыбжьара. Афинал аҿы изцыхәмаруаз аҳҭнықалақьтә команда "Спартак" иаиааит 55-39 ҳәа.
Афиналтә хәмарраан акоманда агәы дырхаҵарц Очамчырантәи жәпаҩык рыдгылаҩцәа рзааит.
Акоманда алахәыла Кама Турнанба еиҭалҳәеит аиԥыларақәа зегь раасҭа афиналтә хәмарра шыуадаҩыз.
"Афиналбжатә хәмаррагьы акыр иуадаҩын, аха ҳара иҳалҳаршеит аԥыжәара агара", — ҳәа еиҭалҳәоит лара.
Аспортсменка еиҭалҳәоит абри аспортхкы аа-шықәса раахыс дшалахәу, изныкымкәа атәыла ачемпионат дшалахәхахьоу. Турнанба иазгәалҭоит очамчыратәи акоманда аиааира даара агәахәара шылнаҭо.
Аԥсны абаҩрҵәыреи аспорти рзы аҳәынҭеилакы аспорттә ҟәша аиҳабы Жанна Занҭариаԥҳа иазгәалҭеит Аԥсны ачемпионат қәҿиарала ишымҩаԥысыз.
"Акомандақәа ахәмарра ҳарак ҳдырбеит. Ҷыдала ҳдыргәырӷьеит очамчыраа", — ҳәа лҳәоит лара.
Лара лажәаәқа рыла, ачемпионат аихшьаалақәа азыԥхьагәаҭахоит амилаҭтә команда аиҿкаараан.
Атурнир аӡбаҩ хада Николаи Гушьчин иҳәеит ачемпионат гха заҵәыс иамоу – ахәмарратә мшқәа рмаҷра ауп ҳәа.
"Хымш ракәын иҳамаз. Мышкы ҩ-хәмаррак мҩаԥгатәын. Ахәмарыҩцәа уи акыр ирзыуадаҩын", — ҳәа еиҭеиҳәоит аӡбаҩ.
Иара иазгәеиҭеит акомандақәа рыҩаӡара ҳаракын ҳәа, иара убри аан иҳәоит ахәмаррақәа, егьырҭ атәылақәа рҿеиԥш асезон зегьы имҩаԥыслароуп ҳәа.
Кама Турнанба лыдагьы ачемпионат аҟны иреиӷьыз ахәмарыҩ ҳәа иалыркааит: Дана Начҟьебиаԥҳа (Очамчыра), Валериа Бахаиа (Очамчыра), Викториа Мишьченко (Бзыбь), Милена Чаилиан (Аҟәа).
