Бадри Есиава, Sputnik
Агәыҳалалратә аукцион "Агәы аԥхарра" Аҟәа имҩаԥысуеит ҩынтәны. Аукцион иалагаанӡа алотқәа ықәыргылан Москва Аҩны аҿы. Дарбанызаалак амеценат илшон ԥхьаҟа иааихәараны иҟаз абара: 35 сахьеи, Давид Џьопуа иҟаҵамҭа - аҳәызбеи.
Зегь раԥхьа арахь иааиит ахәыҷтәы ансамбль "Абаза" акәашацәа. Дара аҭааҩцәа ргәы дырҿыхон рыкәашарала. Аскрипкарҳәаҩ Вачик ихәмарра шамахамзар зегь хнахуан. Иара аа-композициак рҟынӡа неигӡеит, Instagram аҟны ишиашо ицо аефирқәа "дырфырхаҵахеит", Facebook аҿы апостқәа жәпакы изыркит.
Амҩаԥгаҩ Алхас Манаргиа аукцион аартуп ҳәа рылеиҳәоит, амеценатцәа ирабжьигоит рԥарақәа иаразнакы инырымхырц, алотқәа ахьырацәо азы. Азал ахь иааргоит асахьаҭыхыҩ Саид Возба ирҿиамҭа - " Амҳаџьырқәа рыԥшаҳәа". Иаарласны иара аархәоит жәа-нызқьмааҭ ҳәа. Ахәылԥаз алагамҭаз ари угәы азҭазҵоз хҭысын. Аха абри ашьҭахь хԥа-ԥшьба лот аӡәгьы иааимхәеит.
Амҩаԥгаҩ длафуазу ииашан иҳәозу узымдыруа иазгәеиҭеит уаллагьы иҭиир шилшо. Азал аҿы итәаз ччон, аха аҭагылазаашьа аҽеиҭанамкит.
Абри ашьҭахь Витали Қацәба иусумҭа "Ҟрым" жәа-нызқьмааҭ ҳәа иаалхәоит Аҟәа инхо Мадонна.
Мадина Бигәааԥҳа лусумҭа "Аԥхынтәи амш" акәзар еимакхеит. Аԥхьатәи ахәԥса хә-нызқьмааҭ инаӡон. Еимаркуан иара арԥызбеи аԥҳәызбеи. Аҵыхәтәаны 16 нызқьмааҭ ҳәа Есма Гарцкиаԥҳа лколлекциаз илгоит.
Миранда Кьышьмариаԥҳа лусумҭа "Риҵа. Ашәарыцаҩ иҩны" ааихәоит Денис Саманба, 8 нызқьмааҭ ҳәа.
"Сара даара исгәаԥхоит Миранда лстиль. Ара ицәыргаз лырҿиамҭақәа зегь аинтерес рыҵан, аха абри еиҳа сыхнахит" иҳәоит Саманба иагьазгәеиҭоит ашьхараҿ аҩны имазарц агәаҳәара шимоу.
Кристина, Саид Возба ирҿиамҭа - " Амҳаџьырқәа рыԥшаҳәа" аазхәаз, еиҭалҳәоит лан лымшираз ишаалхәаз, ишылбаз еиԥш ишылгәаԥхаз, агәрагьы лгоит уи ҳамҭа бзиахап ҳәа.
Аукцион аҿы иалыршахеит 17 сахьа рыҭира. урҭ рыхәԥса иартәеит 180 нызқьмааҭ.
Ауаажәларратә еиҿкаара "Кьараз" ахаҭарнак Тамила Соломко лажәақәа рыла асахьақәа раахәара алшоит ԥхынҷкәын нҵәаанӡа.
Алотқәа зегьы рфотоқәеи аинформациеи "Кьараз" асаит аҿы ижәбар алшоит. Иҟоуп имаҷымкәа ауаа арҿиамҭақәа аазхәар зҭаху, аха урҭ иахьа иҳақәымшәеит ҳәа лҳәоит лара.
Еизгахо аԥарақәа рзырхан зылшарақәа ԥку, ахшара рацәа змоу аҭаацәарақәа рыцхраара ҳәа лҳәоит "Кьараз" анагӡаратә директор Камма Гоԥиаԥҳа.
