АҞӘА, ԥхынҷкәын 21 — Sputnik. Очамчыра ақалақь аҿы аныҳәатә ҟазшьа аманы иаартын Урыстәыла афлот ахьӡҭыгаҩцәа Павел Нахимови Федор Ушакови рбиустқәа ҳәа аанацҳауеит Аԥсны иҟоу Урыстәыла АШәМ Аҳәаахьчаратә усбарҭа апресс-маҵзура.
Ауснагӡатә рхы аладырхәит араион аиҳабыра, Аԥсны азинмчратә структурақәа рхаҭарнакцәа.
Аԥсны аҭоурых аҿы иухамшҭуа рыхьӡ аанхоит атерроризм аҿагылара ацентр аҿы зуалԥшьа назыгӡоз: аподполковник В. Квитко, аподполковник Е. Нерсесиан, Аԥсны иҟоу Урыстәыла аҳәаахьчаратә арратә хәҭа аусзуҩ апрапоршьчик аиҳабы А. Удальцов. Дара ҭахеит Аԥсны ашәарҭадара аиқәыршәаразы рырратә уалԥшьа шынарыгӡоз.
Васили Квитко Аԥсны, Гал араион, Чыбырхьынџь ақыҭан абандиттә гәыԥ дҭадырхеит. Урыстәыла ахада иусԥҟала Васили Квитко данҭаха ашьҭахь Афырхаҵараз аорден ианашьоуп. Кисловодск ақалақь, ашкол №15 ихьӡ ахҵоуп.
Атерроризм аҿагылара ацентр аҿы зуалԥшьа назыгӡоз аподполковник Едуард Нерсесиани Аԥсны иҟоу Урыстәыла аҳәаахьчаратә арратә хәҭа аусзуҩ апрапоршьчик аиҳабы Андреи Удальцови ҭахеит ажьырныҳәа 12, 2015 шықәса рзы Риаԥ ақыҭан аоперациа ҷыда амҩаԥгараан.
Едуард Нерсесиан Леон иорден ианашьоуп, Андреи Удальцов — Афырхаҵаразы аорден.
Есышықәса аҳәаахьчаҩцәа-Фырхацәа рпарк аҿы имҩаԥысуеит агәалашәаратә митинг.
