АҞӘА, ԥхынҷкәын 29 — Sputnik. Каири Синаи апровинциа ель-Ариши рҟны Египет ашәарҭадаратә мчрақәа иҭадырхеит атеракт иадҳәалоуп ҳәа агәаанагара ззыҟаз, иара убасгьы аграждантәи атуристтәи обиектқәа рықәлара азыԥхьагәазҭоз 40-ҩык ауаа ҳәа аанацҳауеит РИА Новости.
Урыстәыла адәныҟатәи аусқәа рминистрра урыстәылаа ирабжьнагоит ргәы рҽанызарц.
"Урыстәыла адәныҟатәи аусқәа рминистрра Египет иҟоу урыстәылаа ирабжьнагоит ргәы рҽанызарц, атеррористтә шәарҭара ыҟоуп ҳәа иахьшьо уаҭыԥқәа рыҽрыцәхьаркларц", — ҳәа аҳәоит аусбарҭа асаит аҿы.
Урыстәыла адәныҟатәи аусқәа рминистрра иҭахаз рҭаацәа ирыдышшылоит, ааха зауз иаарласны ршьапы иқәгыларц рзеиӷьаршьоит.
Каир, ԥхынҷкәын 28, асааҭ 18:15 рзы Ель-Мариуты амҩаҿ Ветнамтәи атуристцәа зҭаз автобус ааигәара иԥжәеит анапылаҟаҵаратә рԥжәага. Атәыла апрокуратура хада адыррақәа рыла, аҭыԥ аҿы иҭахеит хҩык ауаа. Аамҭақәак рышьҭахь Египет атәылауаҩ, аекскурсиамҩаԥгаҩ ахәышәтәырҭаҿы аоперациа анизыҟарҵоз иԥсҭазаара далҵит.
Аҽа ҩыџьагьы рҭагылазаашьа акыр иуадаҩуп, урҭ рыԥсҭазааразы аҳақьымцәа ирылшо зегь ҟарҵоит.
Египет аԥыза-министр Мусҭафа Мадбули иазгәеиҭеит автобус ишәарҭадоу атурист маршрут ишаныҵыз.
"Автобус ишәарҭадоу атурист маршрут ианыҵит. Арҭ амаршрутқәа аполициа ирыхьчоит. Автобус аҽа мҩак ала ицеит, убри аан азинхьчаратә усбарҭақәа адырра рыҭамызт", — ҳәа еиҭеиҳәеит иара.
Ашәарҭадаратә прокуратура аусзуҩцәа ахҭыс аҭҵаара напаларкит. Арԥжәага аекспертизахь инашьҭуп.
