АҞӘА, ажьырныҳәа 9 – Sputnik. Анемец газеҭ Handelsblatt адырра ҟанаҵеит ЕАА европатәи аргыларатә еилахәырақәа ҩба, "Северный поток — 2" агазмҩангагатә цәаҳәақәа рышьҭаҵара иаҿу рганахь ала асанкциақәа ҟанаҵар алшоит ҳәа. Абри атәы аанацҳаит РИА Новости.
Асанкциақәа ралагалара аплан аҳәынҭдепартамент аҿы иалацәажәоит, Берлин акәзар, "Северный поток — 2" акритика ҟаиҵоит америкатәи ацҳаражәҳәаҩ Ричард Гренел. Уи изныкымкәа иҳәахьеит агазмҩангага аргылара мҩаԥызго аилахәырақәа ашәарҭара ишҭагыло, асанкциақәагьы аҭыԥ роур шауа ҳәа аҳәоит агазеҭ аҿы.
Агазмҩангага ашьҭаҵара иаҿуп швеицариатәи аилахәыра Allseas, италиатәи аилахәыра Saipem.
Аилахәыра Allseas иадуп 90% рҟынӡа агазмҩангага ашьҭаҵара, Saipem акәзар аусурақәа рыбжак нанагӡахьеит.
Германиа аиҳабыра ракәзар ЕАА аҽазышәарақәа гәҭынчымрала ирышьклаԥшуеит ҳәа аҳәоит Handelsblatt.
"Северный поток — 2" иазыԥхьагәанаҭоит 55 миллиард кубметр агаз мҩанызго ацәаҳәақәа ҩба рыргылара, Балтикатәи амшын аҵа иҵганы Урыстәылантәи Германианӡа.
Аргылара азин ҟарҵахьеит Германиа, Финлиандиа, Швециа. ЕАА уи иаҿагылоуп. Аҿагылара руеит Латвиа, Польша, Литва.
Москва акәзар изныкымкәа аҳәамҭа ҟанаҵахьеит агазмҩангага цәаҳәақәа аполитикатә нырра шыҟарымҵо, Германиа аиҳабыра ракәзаргьы "Северный поток — 2" економикатә проектны иахәаԥшуеит.
