АҞӘА, ажьырныҳәа 21 – Sputnik. Хҩык Урыстәыла аррамаҵзурауаа ҭахеит амҩатә машәыр иахҟьаны ҳәа аанацҳауеит Аладатәи арратә округ апресс-маҵзура.
"Арратә техника Ҵабалтәи аполигон аҟынтәи архарахь албаараан БТР-80 аиҩхаа иҭаҳаит", - ҳәа аҳәоит адырраҭараҿы.
Хҩык аҭыԥ аҿы иҭахеит, аҽа ҩыџьа еиуеиԥшым аахақәа роуит. Ааха зауз иаразнакала авертолиотқәа рыцхыраарала арратә госпиталь ахь инаган.
Аокруг акомиссиа иҟалаз амзыз ашьақәыргыларазы аусҭҵаара мҩаԥнагоит. Иҟоуп еиуеиԥшым агәаанагарақәа: атехника аиқәымшәара, арныҟәцаҩ игха уҳәа.
