АҞӘА, ажьырныҳәа 23 — Sputnik. Каракас имҩаԥысуаз аҿагыларатә акциаҿ аруааи амитинг алахәылацәеи еиҿанагалеит. Иҭахаз рыӡбахә алагьы аинформациа цәырҵит ҳәа аанацҳауеит РИА Новости, апортал Nacional адыррақәа ҵаҵӷәыс иганы.
Венесуела аоппозициатә парламент адепутат Хосе Оливарес аҳәамҭа ҟаиҵеит Катиа араион аҿы имҩаԥысуаз амитингқәа раан аӡәы дҭахеит ҳәа. Амассатә-информациатә хархәагақәа рҿы ирҳәоит ҩыџьа шьуп, ҩыџьа хәуп ҳәа.
Каракас амҩадуқәа рҿы абаррикадақәа рыргылара иаҿуп Николас Мадуро иҿагылақәоу.
Ақалақь Сан-Феликс (аштат Боливар) аҟны амитинг алахәылацәа Венесуела уаанӡатәи ахада Уго Чавес ибаҟа рыблит.
Венесуела аоппозициатә парламент ахада Хуан Гуаидо ажәлар рахь ааԥхьара ҟаиҵеит ажьырныҳәа 23 рзы амитингқәа рахь ицәырҵырц.
Уаанӡа, Венесуелатәи аполициауаа Венесуела аҳҭнықалақь Каракас ақалақь араионқәа руак, Лос-Меседорес аҿы аҿагыларатә акциа иалахәыз ирылахысуан ҳәа адыррақәа ыҟан. Уи аԥхьа адемонстрантцәа раанкыларазы аполициаа рхы иадырхәеит алаӷырӡаагага газ.
Каракас ақалақь Котис араион аҿы аруаа ргәыԥк атәыла амчрақәа ирҿагыланы иқәгылеит. Дара ааныркылеит. Абри ашьҭахь Каракас араионқәа ҩба – Лос-Меседореси Пуерта-Каракаси Котис имҩаԥысуаз аҿагыларатә акциа рҽаладырхәит.
Венесуелатәи аоппозициа адгылара аиҭеит ЕАШ ахада ихаҭыԥуаҩ Маик Пенс.
