АҞӘА, ажьырныҳәа 23 – Sputnik, Асмаҭ Ҵәыџьԥҳа. Аԥсуа режиссиор Инар Нарманиа икиносахьа "Махаз сыхьӡуп" ддырбараны иҟоуп Жәларбжьаратәи акинофестиваль IstanbulInternationalShortFilmFestival аҟны. Жәларбжьаратәи акинофестиваль IstanbulInternationalShortFilmFestival мҩаԥысуеит Сҭамԥыл, жәабран 26 инаркны хәажәкыра 3 рҟынӡа ҳәа Sputnik иазеиҭеиҳәеит арежиссер.
Нарманиа иажәақәа рыла, афильм аҳәаанырцәтәи ахәаԥшҩы идыргалахьеит Индиа имҩаԥысуаз акинофестиваль ALIIFIndiaInternationalFilmFestival аҟны.
"Афильм асиужет универсалтәуп. Убри азы ҳара ҳреалтә ҭагылазаашьа, ҳкультура дарбанызаалак атәымуаҩ изгьы еилкаауп", - иҳәеит арежиссер.
Аԥсуа режиссиор Инар Нарманиа зметраж кьаҿу ифильм "Махаз сыхьӡуп" ӡырыргахьан Жәларбжьаратәи акинофестиваль "Arctic open" аҟны. Афестиваль мҩаԥысуан Архангельск, ԥхынҷкәын 6-9 рзы.
Инар Нарманиа ифильм абри афестиваль аҿы аиааира агеит аноминациа "Иреиӷьу арежиссиор" ала.
Иара убасгьы афильм "Махаз сыхьӡуп" Жәларбжьаратәи акинофестиваль "KONIK Film Festival" (Москва) аҟны аԥхьахә аиухьан.
2016 шықәса рзы Аԥсны ихацыркын Миха Лакрба иновеллақәа рыла зметраж кьаҿу афильмқәа рҭыхра апроект.
Аҭыхрақәа ирылагеит 2017 шықәса рзы, ихыркәшахеит 2018 шықәса рзы.
Аҟәатәи жәларбжьаратәи афестиваль аҿы акиносахьа иреиӷьу аԥхьатәи ах-фильмк рахь иаҵанакит.
Жәларбжьаратәи акинофестиваль IstanbulInternationalShortFilmFestival еиҿкаан 1988 шықәса рзы. Афестиваль азырхоуп зметраж кьаҿу акино адгылара, акинемотографистцәа ҿарацәа русумҭақәа рӡыргара.
