АҞӘА, ажьырныҳәа 25 – Sputnik. Амца зкны ибылуа атанкерқәа рҟынтәи хабарда ибжьаӡу амшынуаа рыԥшаара хыркәшоуп ҳәа аанацҳауеит РИА Новости.
"Аԥшааратә операциа мҩаԥысуеит аха абри аҵакыраԥшьыркцала имҩасуа аӷбақәеи аиқәырхаратә шхәақәеи рыла. Аԥшаара иадыԥхьалаз аӷбақәа аушьҭуп", - ҳәа аҳәоит амаҵзураҿы.
Аӷбақәа абылра иаҿуижьҭеи уажәшьҭа ԥшьымшуп. Аӷбақәа ркьынаара шыҟац иҟоуп, рҽырымԥсахыц.
"Амца маҷк еиқәтәеит, аха макьана имыцәацт", - ҳәа рҳәоит адырраҭарақәа рҿы.
Уажәы "Канди" ахь аиқәырхаҩцәа рынашьҭра азыԥхьагәаҭоуп ҳәа "Росморречфлот" апресс-маҵзураҿы.
Танзаниа абираҟ иаҵагыланы иӡсоз аӷбақәа "Канди", "Маэстро" амца ркит Керчтәи аӡыбжьахалаҿы. Аӷбақәа рҿы иҟан 32-ҩык амшынуаа: 12-ҩык еиқәырхоуп, 10-ҩык хабарда ибжьаӡит, аҽа жәаҩык ҭахеит.
