"Иҳаҩсыз ашықәс ҳара ҳзы иманшәалан, ақәҿиара бзиақәа ҳзаанагеит. Мексика иҟаз жәларбжьаратәи ачемпионат аҟны ари аиҿкаара иалахәу 22 ҳәынҭқарра рҟынтәи жәаа рхы аладырхәит. Сеигәырӷьаны исҳәоит Аԥснынтәи ҳгәыԥ, ҳҩызцәа рыцхыраара абзоурала, уи ачемпионат ҳхы шалаҳархәыз. Аӡӷабцәа (Николь Агәмааԥҳа, Роза Бигәааԥҳа, Сима Ҳаразиаԥҳа - аред.) уажәшьҭа инструкторцәоуп, амаҟа еиқәаҵәақәа рымоуп, акомандатә қәгылараҟны актәи аҭыԥ ргеит, иара убас ркатегориақәа рҟны зегьы ахьтәы медалқәа ргеит. Саргьы аветерантә категориаҟны ахьтәы медал згеит. Ҳацәгьамкәа ҳхы ааҳарԥшит, ҳазлоу жәларбжьаратәи аиҿкаараҟны ҳфедерациа уажәшьҭа фаворитк аҳасабала иахәаԥшуеит уҳәар ауеит. Абар жәашықәса инацуп уи аиҿкаараҟны аус ҳуеижьҭеи. Апрезидиум аизараҟны зегьы аӡәк иеиԥш иақәшаҳаҭхеит 2021 шықәсазы Аԥсынтәыла акарате азы адунеи ачемпионат амҩаԥгара.
Иахьазы ҳазҭаху аҳәынҭқаррақәа иахьынӡаздыруа жәабаҟа ыҟоуп, уи аганахьала иҵегь аус ҳуроуп. Даҽа шықәсыки бжаки рҟынӡа аамҭа ыҟоуп, уи ахыԥхьаӡара иҵегьы еиҳахозар акәхап. Урҭ зегьы Аԥсынтәылаҟа иаауеит. Ҳара аԥшәмацәа раҳасабала зегьы ырмазеины ишахәҭоу ҳарԥылартә еиԥш иаҳзыҟаҵозар ҳәа ауп", - иҳәеит Абыхәба.
Инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҿы.
