АҞӘА, жәабран 15 – Sputnik. "Аԥсны амшынӷбаныҟәареи" "Амшынеиқәатә круизқәеи" Урыстәылатәи аинвестициатә форум - 2019 аҿы аиқәшаҳаҭра рнапы аҵарҩит. Афорум мҩаԥысуеит Шәача.
Абри атәы Sputnik иазааицҳаит "Аԥсны амшынӷбаныҟәара" адиректор ихаҭыԥуаҩ Адамыр Габуниа.
"Аиқәшаҳаҭра ихнаркәшеит уаанӡатәи ҳаилацәажәарақәа. Уажәшьҭа акруизтә еимадара аиҿкааразы апроект аицымҩаԥгара нап алаҳкыроуп", - ҳәа иҳәеит иара.
Аԥсныи Урыстәылеи ркурортқәа рыбжьара акруизтә еимадара хацыркхараны иҟоуп 2020 шықәса рзы. 2019 шықәса рзы аусура иалагоит раԥхьатәи агәаҭаратә ныҟәарақәа аӷба "Князь Владимир" ала, иара уажәы Шәача-Новороссиск-Иалта-Севастополь-Шәача амаршрут ала иныҟәоит. Уажәшьҭа Аҟәагь абарҭ ақалақьқәа ирыцлоит.
"Ҳаиҵазҟьаша акгьы ҟамлар, 2019 шықәсазы раԥхьатәи ареис мҩаԥгахоит. 2020 шықәса рзы инхарҭәааны аныҟәарақәа ҳрылагоит", - ҳәа иҳәеит "Аԥсны амшынӷбаныҟәара" адиректор ихаҭыԥуаҩ Адамыр Габуниа.
Урыстәылатәи аинвестициатә форум - 2019 мҩаԥысуеит Шәача.
