ЖӘЫРГЬЫҬ, жәабран 15 – Sputnik, Бадри Есиава. Зҭагылазаашьа уашәшәыроу адеривациатә туннель аремонт азура азыԥхьагәаҭоуп 2020 шықәса рзы ҳәа аԥсуа журналистцәа ирзеиҭеиҳәеит ЕгрыГЕС анапхгара рхантәаҩы Леван Мебониа.
"2020 шықәса рзы аусурақәа рымҩаԥгара ҳагәҭакуп. Усҟан хымз-ԥшьымз раҟара астанциа аусура аанкылатәхоит", - ҳәа иҳәоит Мебониа.
Атуннель аҭагылазаашьа агәаҭаразы агидрофымцастанциа 2017 шықәса рзы жәамш иаанкылан. Усҟан ишьақәыргылан аремонт ахьаҭаху аҭыԥқәа.
Мебониа иажәаәқа рыла, аремонт азы аԥара ыҟоуп, уажәы аусурақәа рымҩаԥгаразы атендер рылаҳәоуп.
"2020 шықәса рзы акы иахҟьаны аусурақәа ҳзымҩаԥымгаргьы 2021 шықәса рзы хымԥада ҳалгароуп. Уаҳа аус нахашьа амам. Апроект ала астанциа ес-хәышықәса иаанкыланы атуннель шыҟоу гәаҭалатәуп. Аҵыхәтәантәи аремонт 13 шықәса раԥхьа иҟаҵан", - иҳәоит Мебониа.
Иара иазгәеиҭеит ГЕС аҿы авариак ҟалар Аԥсны фымцалашарада акраамҭа инхар шалшо.
ЕгрыГЕС ахархәарахь ирыҭан 1978 шықәса рзы. Астанциа агидроагрегатқәа Аԥсны аҵакыраҿ иҟоуп, аӡеизакырҭеи аплотинеи – Қырҭтәыла аҵакырҭаҿы. ГЕС алшара — 1300 мегаватт иҟоуп.
