АҞӘА, хәажәкыра 5 - Sputnik. Атоматқәа афатә аҿы рхархәара иланарҟәуеит агәаҵәа ашшаиура, акьыбачымазара, ахьҭалаларақәа, ашәрақәа ҳәа аҳәамҭа ҟарҵеит Тафтс ауниверситет (ЕАА) аҵарауаа ҳәа аанацҳауеит РИА Новости.
Аҵарауаа аҳәынаԥқәа рцәеижь аканцероген алагаланы аекспериментқәа мҩаԥыргеит. Аконцероген агәаҵәаҿы зхаҭашьа бааԥсу ачыра арҿион. Убри аан ҳәынаԥқәак ишаабац акрырҿарҵон, егьи ахәҭак рхәы аликопин злоу атомат лага ала ибеиан. Аҩбатәи ахәҭа иаҵанакуаз аҳәынаԥқәа рцәеижь аҿы ԥыҭраамҭак ашьҭахь ашәра еиҳа еиҵахеит.
Ликопин захьӡу акаротиноидтә пигмент атоматқәа, акарпыжә, агуава уҳәа аԥшшәы рнаҭоит. Иара функциа хадас иамоуп ауаҩытәыҩса ицәеижь аҿы ихәарҭоу амикрофлора аизырҳара.
Аҵарауаа иара убасгьы ишьақәдыргылеит атомат лага еиҳа хәарҭара шалоу, хазы игоу аликопин аасҭа. Аҵарауаа ргәаанагарала, ари зыхҟьо атоматқәа акыр хәарҭара злоу авитаминқәа Е, С, аминералқәа, афенолтә еидыларақәа, афатә хацхәқәа уҳәа ахьрылоу азоуп ҳәа.
