АҞӘА, хәажәкыра 14 – Sputnik, Бадри Есиава. Аԥхьаҩцәа ҿарацәа Жәларбжьаратәи реиндаҭлара амилаҭтә хәҭаҟны аиааира згаз "Артек" апутиовкақәа роуеит афинал ахь инеиразы ҳәа еиҭалҳәоит Аԥсны иҟоу "Россотрудничество" ахаҭарнак Наталиа Каиун.
"Аиндаҭлара 77-ҩык ахәыҷқәа алахәын. Ажиури иалыркааит хҩык: абжьаратә школ №6 аҵаҩы Милена Чаилиан, абжьаратә школ №10 аҵаҩы Анастасиа Аиба, абжьаратә школ №7 аҵаҩы Алексеи Улыбин. Арҭ ахҩык "Артекҟа" анаԥхьара роуит", - ҳәа еиҭалҳәоит Каиун.
Лара лажәақәа рыла аиндаҭлара аиҿкааҩцәа дара рныхрақәа зегьы ирыҵагылоит.
Алахәылацәа ахьырацәаз инамаданы ажиури аҽа фҩык алыркааит. 4 -10 аҭыԥқәа зауз ироуеит алшара аҵаратә проект "Здравствуй Россия" аҽалархәразы. Уи рыдагьы даҽа хҩык аиндаҭлара алахәылацәа иранаршьеит адипломқәеи аҳамҭақәеи.
"Аиндаҭлара 10 шықәса инаркны изхыҵуа рзы ишеиҿкаазгьы иаҳзааиз ҳарзымӡырҩыр ауамызт. Убас, Очамчырантәи иаҳзааз, аа-шықәса зхыҵуаз Ирена Погосиан исахьаркны атекст даҳзаԥхьеит", - ҳәа лҳәоит Каиун.
Аԥхьаҩцәа ҿарацәа Жәларбжьаратәи реиндаҭлара амилаҭтә хәҭа Аԥсны имҩаԥысуеит 2018 шықәса инаркны. Апроект шьаҭаркуп Урыстәыла аҵара аминистрра, Россотрудничество, "Роспечать", афонд "Русский мир", афонд "Живая классика", акультуреи аҟазареи рыдгыларала.
Аиндаҭлара ажиури иалахәын: Аԥсны жәлар рартистка Софа Агәмааԥҳа, Аԥсны зҽаԥсазтәыз артистка Нина Балаева, "Россотрудничество" ахаҭарнак Анжела Ақаҩԥҳа.
