АҞӘА, хәажәкыра 18 — Sputnik. ЕАА рҟынтәи абџьархыхразы ажәалагала ҟамлацт ҳәа иҳәеит Урыстәыла ахада ипресс-маӡаныҟәгаҩ Дмитри Песков, ЕАА ахада амилаҭтә шәарҭадаразы ицхырааҩ Џьон Болтон абџьархыхразы аиҿцәажәарақәа мҩаԥгахар алшоит ҳәа ииҳәаз ахҳәаа ааҭо. Абри атәы аанацҳаит РИА Новости.
Уаанӡа ЕАА рхада амилаҭтә шәарҭадаразы ицхырааҩ Џьон Болтон аҳәамҭа ҟаиҵахьан Урыстәыла, Китаи, Америка рабџьархыхра иалацәажәар алшоит ҳәа.
"Китаи аиадертә лшара еизнарҳауеит. Ҳара ҳмилаҭтә ракетаҿагыларатә система арӷәӷәарагьы убри шьаҭас иамақәоу иреиуоуп. Аурысқәеи ҳареи абџьар амазаара ахылаԥшразы ҳаилацәажәозар, Китаигьы уи аилацәажәара иалархәызар ауеит", - ҳәа Болтон иажәақәа акьыԥхьит The Hill.
Урыстәыла Афедерациа ахеилак жәларбжьаратәи аусқәа рзы аилак ахантәаҩы Константин Косачиов иазгәеиҭеит ЕАА макьаназы ишазыхиам ДРСМДи КНДРи рзы аиҿцәажәара, убри азы Болтон иажәақәа зынӡа рыгәрагара ахәҭамзар ҟалап ҳәа.
Ԥлиаԥҳа: Америка ишаҭаху еиԥш Урыстәыла анацәахы иахьазҭамыргьежьуа иазхгом
ЕАА рхада Дональд Трамп уаанӡа аҳәамҭа ҟаиҵахьан Вашингтон жәабран 2 рзы ДРСМД аганахьала Урыстәылеи иареи реиқәшаҳаҭра иалҵыр ҟалоит ҳәа.
Владимир Путин уи аҭакс иҳәеит Урыстәылагьы Америкеиԥш ахы шымҩаԥнаго.
