АҞӘА, хәажәкыра 22 – Sputnik. Аԥсны аԥыза-министр актәи ихаҭыԥуаҩ Даур Аршбеи Ҟрым аиҳабыра рхада ихаҭыԥуаҩ Георги Мурадови еиԥылеит Москва, хәажәкыра 22 рзы.
"Ҳара, Урыстәыла иҟоу Аԥсны Ацҳаражәҳәаҩи сареи, Жәларбжьаратәи аконференциа "Ҟрым ҳаамҭазтәи агеополитикаҿы - Ҟрымтәи ааԥын 5 шықәса ахыҵра" ҳалахәын. Сара Аԥсны ахада ихьӡала адныҳәаларатә шәҟәы саԥхьеит. Уа сыҟазаара еиҳаракгьы изыдҳәалаз Аԥсни Урыстәылеи реиҳабырабжьаратә комиссиа ацхантәаҩи сареи ҳаиԥылара акәын, аха ауснагӡатәқәа анеиқәшәа, аконференциа аԥшәмацәа, Урыстәыла иҟоу Ҟрым ахаҭарнакра ааԥхьара ҳарҭеит", - иҳәоит Даур Аршба.
Аиԥылараҿы ирылацәажәан еиуеиԥшым ахырхарҭақәа змоу ҩганктәи аизыҟазаашьақәа. Иалацәажәан аиҳабырабжьаратә комиссиа аҩбатәи аиқәшәара арыцхә ҳәа иҳәоит иара.
"Аиԥылара мҩаԥысраны иҟоуп Ҟрым, жьҭаарамзазы. Иара убасгьы ҳалацәажәеит Иалтатәи аекономикатә форум аԥснытәи аделегациа алахәхара азҵаара", - азгәеиҭоит Аршба.
Аиҳабырабжьаратә комиссиа аҩбатәи аиқәшәара амҩаԥгараан ирзааҭгылоит ақыҭанхамҩа, атуризм, аҵара, аҭҵаарадырра, аспорт, акультура рызҵаарақәа.
"Ишьақәыргылоу апланқәа инарықәыршәаны, иҟоуп имҩаԥысхьоу ауснагӡатәқәа: жәабранмзазы ансамбль "Кавказ" Ҟрым иқәгылеит, иара убасгьы Аԥсны Ақыҭанхамҩа аминистр Ҟрым иҟазаараан еиуеиԥшым аиԥыларақәа мҩаԥган. Уажәазы еиҿыркаауеит есышықәсатәи аекономикатә форум аҿы аԥсуа делегациа алахәра аусқәа", - иҳәоит Даур Аршба.
Аԥшьаша, хәажәкыра 21 рзы Москва имҩаԥысуаз жәларбжьаратәи аконференциа "Ҟрым ҳаамҭазтәи агеополитикаҿы - Ҟрымтәи ааԥын 5 шықәса ахыҵра" алахәылацәа ашәҟәы рзынеишьҭит Аԥсны Аҳәынҭқарра ахада Рауль Ҳаџьымба.
Аизыҟазаашьа ҿыцқәа шьақәгылоуп ахәаахәҭра-економикатәи, аҭҵаарадырра-техникатәи, агуманитартәи усеицуразы Аԥсни Ҟрыми рнапы зцеиҵарҩыз Аиқәшаҳаҭра инақәыршәаны ҳәа азгәаҭоуп атәыла ахада инашьҭымҭаҿы.
