Аҟәа, хәажәкыра 23 – Sputnik, Сариа Кәарацхьиаԥҳа. Мшаԥы 6 рзы Шәача имҩаԥысраны иҟоу апрофессионалтә бокс ахәылԥаз аҟны аԥсуа боксиор Игор Адлеиба аринг аҿы диԥылоит аурыс спортсмен Алексеи Тухтаров. Абри атәы Sputnik акорреспондент илзеиҭеиҳәеит Аспорт азы Аԥсны аҳәынҭқарратә еилакы ахантәаҩы ицхырааҩ Артур Адлеиба.
"Алексеи Тухтаров 33 шықәса ихыҵуеит. Иара акикбоксинг азы аспорт азҟаза ҳәа жәларбжьаратәи акласс даԥсахахьеит, хынтә Европа дачемпионхахьеит, хынтә Урыстәыла дачемпионхахьеит, Адунеи ахраҿа аԥхьахә игахьеит. Уи Игор 15 шықәса рыла диеиҳабуп, аха Игор уи иԥылара дазыхиоуп. Иаҳбап, аринг аҿы иҟало", – иҳәеит Артур Адлеиба.
Игор Адлеиба уажәы Екатеринбург дыҟоуп. Аспорт азы Аԥсны аҳәынҭеилакы ахантәаҩы ицхырааҩ иажәақәа рыла, аспортсмен аиндаҭлара иҽазыҟаиҵоит.
Игор Адлеиба ари аиқәԥараҟны даиааир, иреитинг акыр иҳараикуеит.
Адлеиба: Урыстәыла иреиӷьу абоксиорцәа жәаҩык ртоп сақәшәар ауеит
Аԥсуа спортсмен Игор Адлеиба апрофессионалтә бокс ахәылԥаз аҟны дықәгылоит мшаԥы 6 рзы Шәача ақалақь аҟны.
