АҞӘА, хәажәкыра 28 - Sputnik. Евроеидгыла Израиль асуверинитет Голантәи аҳаракырақәа аҵанакуеит ҳәа ишазханамҵо азы официалла аҳәамҭа ҟанаҵеит. Абри атәы аанацҳауеит РИА Новости аҳәаанырцәтәи аусқәеи аполитикеи ашәарҭадареи рзы Евроеидгыла ахада Федерика Могерин лажәақәа ҵаҵӷәыс иганы.
"Голантәи аҳаракырақәа рганахь ала Евроеидгыла апозициа аҽаԥсахуам. Жәларбжьаратәи азини ООН Ашәарҭадаратә хеилак арезолиуциақәа 242, 497 инарықәыршәаны Евроеидгыла Израиль асуверинитет Голантәи аҳаракырақәа аҵанакуеит ҳәа иазханаҵом", - аҳәоит аҳәамҭаҿы.
Голантәи аҳаракырақәа Шьамтәыла иахәҭакын 1967 шықәса рҟынӡа. Уи ашьҭахь арҭ аҳаракырақәа Израиль анапахьы иаанагахьан, аибашьрақәа ирылҵшәаны.
Анаҩс, 1973 шықәсазтәи аидыслара ашьҭахь, еицеиқәшаҳаҭны аҩ-ҳәынҭқаррак рарбџьармчқәагьы алыргахьан. 1974 шықәсазы ЕАР аҭынчреиқәырхаратә ар алагалан. 2013 шықәсазы атеррористцәа аналала ашьҭахь, ЕАР рымчқәа арҭ адгьылқәа рҟынтәи иқәыргеит.
2018 шықәсазы Шьамтәыла Израиль иазааигәоу апровинциа Ель-Кунеитра анапахьы иаанагеит. Убри ашықәсазы ЕАР аҭынчреиқәырхаҩцәа ҩаԥхьа ари азона ахылаԥшра иалагеит.
