"Араион аҟны аветеринартә ҳақьым дҳамоуп. Абга аныршьлак, алымҳақәеи аҵыхәеи аҳақьым изааргоит, Маҷарка администрациаҟны хаз игылоу ахыбраҟны. Абга азы х-нызқь мааҭ ршәоит, абгалаџқәа ракәзар 500 мааҭ. Иахьазы абгалаџқәа 13 аларҵахьеит, урҭ иаҳа ирацәоуп. Аҟәантәи аветеринартә маҵзура анапхгара ааираны иҟоуп, урҭ игәарҭоит иааргаз, иршьыз абгалаџқәеи абгақәеи шаҟа ыҟоу", - иҳәеит Ҳаџьымба.
Иара иазгәеиҭеит ауаа аԥхасҭа рызҭоз агыгшәыгқәа усгьы ишыршьуаз, аха аԥара анахыршәаауа, иаҳа аус иахаҵгылоит ҳәа.
"Аамҭак азы аԥара ашәара аанкыланы иҟан, аха иахьазы уадаҩра ыҟаӡам, ишьу агыгшәыгқәа аԥара рхыршәаауеит. Излаздыруа, Аминистрцәа реилазаара аԥара аветеринартә маҵзура иазоурыжьуеит, дара рыхәҭаахьала ашәарыцаҩцәа ирзыршәоит", - иҳәеит Ҳаџьымба.
Убри аан иазгәеиҭеит иршьуа агыгшәыгқәа зегьыҵәҟьа аԥара азы ишаларымҵо, ашәарыцаҩцәа еибыҳәаны агыгшәыгқәа ианырхыҩуа ыҟоуп, иршьуа анышә иамардоит.
Сынтәатәи ашықәс иалагӡаны Гәылрыԥшь араион аҟны 30 хы инарзынаԥшуа агыгшәыгқәа ршьхьеит, урҭ рахьынтә 28 бгалаџи бга дуки ҳәа адырра ҟаиҵеит араион ахада ихаҭыԥуаҩ.
Шәазыӡырҩла арадио Sputnik Аԥсны аефир.
