АҞӘА, лаҵара 7 – Sputnik, Бадраҟ Аҩӡба. Акомандақәа "Афон" галтәи "Самурзаҟани" 1:1 ҳәа еицыхәмарт ҳәа Sputnik акорреспондент иазааицҳаит ашьапылампыл азы Аԥснытәи алига адиректор Витали Федоренко.
Аханатә Аԥсны Ахраҿаз ахәмаррақәа ирылахәын акомандақәа фба: агәыԥ "А" ахь иаҵаркын – "Афон", "Динамо", "Самурзаҟан". Агәыԥ "B" иаҵанакуеит –"Нарҭ", "Гагра", "Риҵа".
Ашьапылампыл азы Аԥсны Ахраҿа аԥҟаррақәа рыла гәыԥцыԥхьаӡа ркомандақәа ҩба-ҩба хәмарра мҩаԥыргароуп, еиҳа акәаталақәа зауа агәыԥқәа ирылҵуеит.
Агәыԥ "А" ахәмаррақәа реихшьаалақәа рыла афиналбжахь инеиит "Афони" аҟәатәи "Динамои".
Агәыԥ "В" иатәу "Нарҭ" х-кәаталак амоуп, убриаҟара кәатала амоуп гәдоуҭатәи "Риҵа". "Гагра" макьаназ кәаталакгьы амам. Аҵыхәтәантәи ахәмарраан еиқәшәараны иҟоуп "Риҵеи" "Гагреи".
Афиналбжатә хәмаррақәа мҩаԥысраны иҟоуп 2019 шықәса лаҵарамза 10 рзы, афиналтә хәмарра – лаҵара 14 рзы астадион "Динамо" аҿы.
