АҞӘА, лаҵара 27– Sputnik, Бадрак Авидзба. Аԥснытәи абоксиор Саир Каҷараа 13-14 шықәса зхыҵуа рыбжьара абокс ала Урыстәыла Аԥхьахә азы аиндаҭлараҿ аиааира игеит. Абри атәы Sputnik иазааицҳаит аспортсмен иазыҟаҵаҩ.
Урыстәыла Аԥхьахә аҟны Саир Каҷараа иигаз аиааира иалнаршоит Европа Аԥхьахә аҿы иқәгылара.
"Саир уажәраанӡагьы Краснодартәи атәылаҿацәи Аладатәи афедералтә округи рҟны аԥхьахәқәа игахьан", - иҳәеит иара.
Европа Аԥхьахә мҩаԥысраны иҟоуп сынтәа, нанҳәамзазы.
"Ҳәарада ари аиааира акраҵанакуеит. Саир иеиндаҭлоз даара иӷәӷәан. Атурнир аан Саир ԥшьы-еиԥыларак мҩаԥигеит. Урҭ зегьы рҿы аиааира игеит" - иҳәеит Алиас Агрба.
Абокс ала Урыстәыла Аԥхьахә азы аиндаҭлара мҩаԥысуан лаҵара 19 - 26 рзы, Анапа. Аиндаҭлара иалахәын 455 спортсмен.
