АҞӘА, лаҵара 30 – Sputnik, Бадраҟ Аҩӡба. Аинформациатә маҵзура Sputnik Аԥсны асаит https://sputnik-abkhazia.ru аҟны ConIFA-2019 ахәмаррақәа дырбалахоит.
Аԥснытәи акомандеи Чамериа акомандеи рыхәмарра арбара мҩаԥысуеит рашәара 2 асааҭ 15:00 рзы. Рашәара 3 асааҭ 17:00 рзы имҩаԥысуеит Аԥсныи Сапми ркомандақәа реицыхәмарра. Рашәара 4 асааҭ 17:00 рзы ашьапылампыл абзиабаҩцәа ахәаԥшырц рылшоит Аԥсныи Арцахи ркомандақәа рыхәмарра. Афиналтә хәмарра дырбахоит рашәара 9 асааҭ 19:00 рзы.
Агәыԥ "А" иаҵанакуеит: Аԥсны, Чамериа (Албаниа), Сапми (Лапландиа), Арцах. Агәыԥ "Б": Паданиа (Италиа), Секеитәи атәылаҿацә (Румыниа), Мраҭашәаратәи Ермантәыла (Ҭырқәтәыла), Аахыҵ Уаԥстәыла.
ConIFA аверсиала Европа ашьапылампыл азы ачемпионат аадыртуеит рашәара 1 азы ареспублика Арцах (Ашьха Ҟарабах – аред.), афинал мҩаԥгахоит Степанакерт рашәара 9 рзы.
Аԥснытәи акоманда аилазаараҿ иҟоуп: амбахьчаҩцәа - Инал Қацәба, Илиа Шьчерба, ахьчаҩцәа - Лев Ҭарба, Георги Жанаа, Лев Бабурин, Асҭамыр Ҵышәба, ахьчаҩбжацәа - Ҭемыр Агрба, Шабаҭ Логәуа, Тарас Ҳагба, Гига Бениӡе, Виктор Ԥимԥиа, Даур Ҷанба, Ака Званбаиа, Алан Хугаев, Даниил Чрыгба, Гәдиса Смыр, Роман Зикрач, ажәылаҩцәа - Дмитри Маскаев, Рамин Барцыц, Данило Арӡынба.
Уаанӡатәи адыррақәа рыла Ницца, Сардиниа, ДЖәР, ЛЖәР ркомандақәа ачемпионат изалахәхом.
ConIFA шьаҭаркын рашәара 7 2013 шықәса рзы. Еиднакылоит FIFA иалам ашьапылампылтә командақәа.
