АҞӘА, ԥхынгәы 12 - Sputnik. Аԥсны апрофессионалтә бокс Афедерациа ахада, абокси, ақәԥареи, атлетика хьанҭеи рзы Ареспубликатә школ адиректор Альберт Карди-оӷлы иҳәеит аԥснытәи абоксиорцәа Аԥсны анҭыҵ ркариера аизырҳара зыхҟьо азы игәаанагара.
"Ҳара, азыҟаҵаҩцәа, иаҳҭахуп ҳаспортсменцәа Европеи адунеии рчемпионатқәеи Аолимпиатә хәмаррақәеи рҟны аԥхьахәқәа ргалар. Аха ҳара иҳамаӡам уи аҩыза алшара асеиԥш иҟоу аиндаҭларақәа рылахәхаразы. Убри инадҳәаланы ҳҽазаҳшәоит ҳааӡамҭацәа рреитинг ашьҭыхразы аҳәаанырцәтәи ашколқәа рыҭара. Ари маӡам. Зегьы еицаадыруоуп", - иҳәеит Карди-оӷлы.
Апрофессионалтә бокс аҿы ари аус ҭышәынтәалан иҟоуп – аиқәшаҳаҭрақәеи аилаӡарақәеи шьақәҳаргылахьеит, иҳәоит Карди-оӷлы. Иара иажәақәа рыла, иҟоуп аԥсуа бираҟ иаҵагыланы ақәгылара зылшо аспортсменцәагьы. Аолимпиатә бокс аҿы уи аҩыза азин рымам. Аиндаҭларақәа рыԥҟарақәа уи азин ҟарҵом.
