АҞӘА, ԥхынгәы 24 - Sputnik, Бадри Есиава. Аԥсны ВДНХ аиубилеитә цәыргақәҵа изалахәхом ҳәа Sputnik акорреспондент изеиҭеиҳәеит Урыстәыла иҟоу Аԥсны ахәаахәҭра ахаҭарнак Олег Барцыц.
"Ацәыргақәҵа ҳхы ҳзалархәуам апавилион аремонт иахьаҿу азы. Уажәы ҳареи Аԥсны акультура аминистрреи аилацәажәарақәа мҩаԥаагоит, аха ишаабо ала ВДНХ аиубилеитә цәыргақәҵа ҳколлективқәа рыда имҩаԥгахоит" ҳәа иҳәоит Барцыц.
Барцыц иҳәеит ВДНХ анапхгареи аҳҭнықалақь аиҳабыреи абри азҵаара аганахь ала Аԥсны аилкаара арҭоит, ҳара ҳазыхиахар иахәҭаны иҟоу ауснагӡатәқәа мҩаԥгахоит ҳәа.
"Ҳара ҳшазыхиахалак ВДНХ иреиӷьу асценақәа ҳарҭоит. Иҟаҳҵаша зхьыԥшу апавилион ахиароуп" ҳәа иҳәоит Барцыц.
ВДНХ аԥсуа павилион аремонт иалагеит 2017 шықәса рзы. Имҩаԥысуеит Москва аиҳабыра рԥаразоужьрала. 2018 шықәса рзы адәахьтәи аусурақәа хыркәшан, ахыбра аҭоурыхтә ԥшра азырхынҳәын. Апавилион шьаҭанкыла арҽеира хыркәшахараны иҟоуп 2020 шықәса рзы.
ВДНХ – Урыстәылазегьтәи ацәыргақәҵатә центр. Иарахьы иаҵанакуеит 50 цәыргақәҵатә центр, ахышәа-ҵышәа иартәоит - 237,5 гектар, апавилионқәа рхышәа-ҵышәа - 134 000 м².
