АҞӘА, ԥхынгәы 24 – Sputnik, Асмаҭ Ҵәыџьԥҳа. XVI Жәларбжьаратәи ашахматтә фестиваль "Abkhazia Open-2019" алахәхаразы рыҽҭарҩит 100-ҩык инарзынаԥшуа алахәылацәа. Абри атәы арадио Sputnik иазеиҭеиҳәеит Аԥсны Ашахматтә федерациа аиҳабы Константин Ҭыжәба.
Афестиваль аофициалтә аартра мҩаԥысит ԥхынгәы 23 рзы Гәдоуҭа. Ҭыжәба иажәақәа рыла, арахь иааит Москва, Санкт-Петербург, Челиабинск, Красноиарск рҟынтәи ашахматасыҩцәа.
"Атмосфера аиҩызаратә ҟазшьа амоуп. Афестиваль аартраан зегьы Абираҟ амш рыдаҳныҳәалеит. Аԥхьатәи амш азы агәыԥ С – 8 шықәса рҟынӡа зхыҵуа, агәыԥ B -11 шықәса рҟынӡа зхыҵуа еиндаҭлеит", - ҳәа еиҭеиҳәоит иара.
Аԥсны ашахмат азы Афедерациа аиҳабы Константин Ҭыжәба иазгәеиҭеит аԥҟарақәа рыла алахәылацәа рынхарҭаҭыԥқәа рхала заанаҵы иҿарҵоит ҳәа.
"Аиҿкааҩцәа ахәмарырҭатә зал, амыругақәа еиқәдыршәоит", - иҳәоит иара.
XVI Жәларбжьаратәи ашахматтә фестиваль "Abkhazia Open-2019" Аԥсны имҩаԥысуеит ԥхынгәы 22 инаркны нанҳәа 20 рҟынӡа: Гагра, Гәдоуҭа, Аҟәа. Афестиваль аҳәаақәа ирҭагӡаны имҩаԥгахоит афонд "Кьараз" хылаԥшра ззыҟарҵо адгылара рыҭаразы агәыҳалалратә цәыргақәҵа.
Иара убас шәаԥхьар ҟалоит:
-
Кәыҵниа ашахмат иазкны: сшьаҿақәа ҭазыҩуеит, нас сыхәмаршьа аҩны еилсыргоит
-
Пицундатәи ашахматасцәа хәыҷқәа ақәҿиарақәа аадырԥшуеит
