АҞӘА, нанҳәа 20 — Sputnik. Лиудмила Зыкина лыхьӡ зху Аурыс милаҭтә ҳәынҭқарратә академиатә ансамбль "Россия" ықәгылараны иҟоуп ашәахьа, нанҳәа 26 рзы Аԥснытәи аҳәынҭқарратә филармониаҟны.
Ахьыԥшымра азхаҵара амш иазку аконцерт мҩаԥысуеит акультуратә сезон "Урыстәыла – Аԥсны 2019" аҳәаақәа ирҭагӡаны, абри атәы аанацҳауеит Аԥсны Акультура аминистрра.
Аконцерт иалагоит асааҭ 18:00 рзы. Аҩналара хәыда-ԥсадоуп.
Ансамбль "Россия" арепертуар аҟны иҟоуп аус здырулаз аурыси аҳәаанырцәтәи композиторцәа рыклассикатә инструменталтә рҿиамҭақәа, адунеи ажәларқәа рмузыка, иахьатәи аамҭа иатәу акомпозиторцәа рырҿиамҭақәа, иара убас арҿиамҭақәа жәпакы аԥырҵеит ансамбль амузыкантцәа.
